Atyraý-Oral trassasy: Inderborǵa burylatyn joldyń eki jaǵyna sý jınaldy
ATYRAÝ. KAZINFORM – Atyraý-Oral trassasynan Inderbor kentine burylatyn 7 shaqyrym joldyń eki jaǵyna sý jınaldy.
Atyraý oblysynyń jedel shtabynan málim etkendeı, búgin, 8 mamyrda tańerteńgi saǵat 08:00-de Jaıyq ózeniniń deńgeıi Inderbor kentiniń tusynda 959 santımetrge jetken edi. Bul kórsetkish qaýipti shekten +114 santımetrge kóp bolyp otyr.
Atyraý-Oral baǵytyndaǵy trassadan Inderbor kentine burylatyn joldyń eki jaǵyndaǵy jaıylmaǵa sý jınalǵan. Aýdan ortalyǵyna baratyn bul joldyń uzyndyǵy – 7 shaqyrym.
«Joldyń eki jaǵyna birneshe saǵat jaýǵan jańbyrdyń sýy jınaldy. Al, asfalttyń ústinde jańbyrdyń azdaǵan sýy bar. Ór sýynyń asfaltty basý qaýpi bolǵandyqtan, keshe joldyń eki jaǵyna topyraq tógilip, bóget turǵyzyldy. Qazir jaǵdaı baqylaýǵa alyndy», -dep habarlady Inder aýdanynyń ákimdigi.
Eske sala ketelik, budan buryn Jaıyq ózeniniń deńgeıi Inderbor kentinde shekti deńgeıden 114 santımetrge asyp ketkenin habarlaǵan edik.