«Atyraý – Oral» avtojolynyń 364 shaqyrymy jóndeýden ótedi
ASTANA. KAZINFORM – Respýblıkalyq mańyzy bar KAZ12 «Atyraý – Oral» avtomobıl jolyna ortasha jóndeý jumystaryn júrgizý josparlanyp otyr. Bul týraly «QazAvtoJol» ulttyq kompanııasy málim etti.
Jalpy uzyndyǵy 487 shaqyrym bolatyn bul jol Batys Qazaqstan óńirindegi Atyraý men Oral qalalaryn baılanystyrady. Josparlanǵan joba aıasynda 364 shaqyrym jol tósemin jóndeý kózdelip otyr.
Kompanııa málimetinshe, negizgi jumystar ıirimdi ýchaskelerdi túzeý, topyraq qurylymyn qaıta óńdeý arqyly jol negizin nyǵaıtý, astyńǵy jáne ústińgi qabattaryn tóseý, joljıekti kúsheıtý, jol belgileri men tańbalaryn ornatý sııaqty kezeńderdi qamtıdy.
- Qazirgi ýaqytta jobany qarjylandyrý tetikteri qarastyrylyp jatyr. Qarajat bólingen soń jobalyq-smetalyq qujattama ázirlenip, tıisti saraptamadan ótedi. Joba kezeń-kezeńimen júzege asyrylady, - delingen aqparatta.
Sonymen qatar, atalǵan baǵytta shuńqyrlardy jóndeý jumystary jalǵasýda. Ortasha jóndeý jumystaryn 2025–2027 jyldar aralyǵynda júrgizý josparlanǵan.
Aıta keteıik, sońǵy kúnderdegi aptap ystyq Shymkent - Taraz avtojolynyń jabynyn kóterip jibergen.