Atyraý óńirinde baıdarka men kanoe esý maýsymy bastaldy
ASTANA. KAZINFORM — Atyraýda sońǵy jyldary jasóspirimder arasynda eskek esý sportyna qyzyǵýshylyq artyp keledi.
Óńirlik kommýnıkatsııalar qyzmetiniń málimetinshe, qazir № 1 balalar-jasóspirimder sport mektebinde 70-ten astam jas sportshy turaqty túrde jattyǵady.
Bıyl atyraýlyq sportshylar kóktemgi Qazaqstan chempıonatynda, Oral qalasynda ótken respýblıkalyq jarystarda jáne Azııa chempıonatynda joǵary nátıjelerge qol jetkizdi. Nátıjesinde oblys qorjyny 11 altyn, 6 kúmis jáne 3 qola medalmen tolyqty.
Túrkistanda ótken Azııa chempıonatynyń qola júldegeri Anatolıı Rýsakov bul jetistikti óziniń sporttyq jolyndaǵy mańyzdy beles retinde baǵalaıdy.
— Bul — Azııa chempıonatyndaǵy alǵashqy júldem. Baıdarka men kanoe esý syrt kózge jeńil kóringenimen, úzdiksiz daıyndyqty talap etedi. Jaqsy nátıje kórsetý úshin kún saıyn jattyǵyp, ózińdi únemi shyńdap otyrý qajet. Aldaǵy ýaqytta budan da joǵary jetistikterge jetýge kúsh salamyn, — deıdi sportshy.
Jattyqtyrýshy Danııar Bekshoıynnyń aıtýynsha, eskek esý sportyna balalar 10 jastan bastap qatysa alady.
— Bul sport túrinde eń aldymen balanyń sýda ózin erkin sezinýi mańyzdy. Sonymen qatar tepe-teńdikti saqtaý, tózimdilik pen tártip te úlken ról atqarady. Jattyǵý barysynda balalardyń fızıkalyq daıyndyǵy ǵana emes, minezi men jaýapkershiligi de qalyptasady. Jaz mezgili — eskek esý sportymen aınalysýǵa eń qolaıly kezeń. Qazir sportshylar halyqaralyq jarystarǵa daıyndyqtaryn jalǵastyryp jatyr, — dedi ol.
Aıta keteıik, búginde Atyraýdaǵy eskek esý bazasyn rekonstrýktsııalaý jumystary bastaldy.
Budan buryn Túrkistanda eskek esýden jazǵy Qazaqstan chempıonaty bastalǵanyn jazǵan edik.
