Atyraý oblystyq tsıfrlandyrý jáne arhıvter basqarmasyna jańa basshy taǵaıyndaldy

ATYRAÝ.KAZINFORM - Atyraý oblysy ákiminiń ókimimen Atyraý oblystyq tsıfrlandyrý jáne arhıvter basqarmasynyń basshysy laýazymyna Marlen Qasenov taǵaıyndaldy.

Marlen Qasenovtiń ekonomıka jáne memlekettik basqarý salasy boıynsha beıindi bilimi bar. 2006 jyly Astanadaǵy saýda-ekonomıkalyq kolledjin, 2010 jyly Qaztutynýodaǵy Qaraǵandy ekonomıkalyq ýnıversıtetin, 2017 jyly Reseı Federatsııasy Prezıdenti janyndaǵy Reseı halyq sharýashylyǵy jáne memlekettik qyzmet akademııasyn támamdaǵan.

Eńbek jolyn Qazaqstan Respýblıkasy Prezıdentiniń is basqarmasyna qarasty vedomstvolyq uıymdarda bastaǵan. Ár jyldary Almaty qalasy ákimdiginde bas ınspektor, memlekettik qyzmetterdi baqylaý jáne aqparattyq tehnologııalardy damytý bóliminiń basshysy, Qazaqstan Respýblıkasy Prezıdenti Ákimshiliginde memlekettik baqylaý jáne uıymdastyrý-aýmaqtyq jumys bóliminiń sarapshysy bolyp jumys istedi.

- Sondaı-aq Astana qalasyna qarasty Almaty aýdany ákiminiń orynbasary, Almaty oblysy Іle aýdanynyń, Qarasaı aýdany ákiminiń orynbasary qyzmetin atqardy. Qazaqstan Respýblıkasy Oqý-aǵartý mınıstrliginiń Infraqurylymdy damytý departamentin basqardy. Sońǵy jyldarda Atyraý oblysynda qyzmet etip, oblys ákimi apparaty basshysynyń orynbasary laýazymynda jumys istedi,-dep málimdedi ákimdiktiń baspasóz qyzmeti.

Osyǵan deıin Atyraýda tabıǵı resýrstar jáne tabıǵat paıdalanýdy úılestirý basqarmasyna jańa basshy kelgenin jazǵan edik.