Atyraý oblystyq Polıtsııa departamentiniń burynǵy ǵımaraty 2 jyldan beri paıdalanylmaı tur
ATYRAÝ.KAZINFORM – Atyraý oblystyq Polıtsııa departamentiniń burynǵy ǵımaraty 2 jyldan astam ýaqyt boıy paıdalanylmaı tur. Quqyq qorǵaý organy 2023 jyldyń mamyr aıynda Nursaıa yqsham aýdanyna salynǵan jańa nysanǵa kóshken edi.
PD burynǵy ǵımaraty Azattyq kóshesinde ornalasqan. Birneshe jyl boıy polıtsııa qyzmetkerleri sol mekenjaıda jumys istedi. Al qazir bul ǵımarat qańyrap bos tur. Aýmaq kúzetiledi. Degenmen salqyndatqyshtyń syrttaǵy bólikteri qulap, terezeleri ashyq jatyr. Bir sózben aıtqanda, nysan tozyp, suryqsyz kúıge túsken.
Bul ǵımarattyń taǵdyryna qatysty saýaldy polıtsııa departamentine de, oblystyq ákimdikke de qoıdyq. Qos tarap ǵımaratty departamentten ákimdiktiń kommýnaldyq menshigine qabyldaý máselesi qarastyrylyp jatqanyn málimdedi.
- Atalǵan nysanǵa qatysty tirkeý jáne quqyq belgileýshi qujattardy zerdeleý barysynda birqatar kemshilik anyqtaldy. Osyǵan baılanysty qazirgi ýaqytta ǵımaratty kommýnaldyq menshikke qabyldaý múmkindigi joq. Atalǵan kemshilikter tolyq joıylyp, tıisti qujattar zań talaptaryna sáıkes tolyq rásimdelgennen keıin nysandy kommýnaldyq menshikke qabyldaý jumysy belgilengen tártippen júzege asady,-dedi oblys ákimdiginiń baspasóz qyzmeti.
Jalpy departament bul ǵımaratqa 1990 jyldardyń sońynda kóship kelgen. Oǵan deıin qurylysqa jaýapty memlekettik mekeme jumys istegen.
Atyraý oblysy Qurmanǵazy aýdanynyń ortalyǵyndaǵy stadıondy jańǵyrtý jumysy aıaqsyz qalǵanyn jazǵan edik.
