Atyraý oblystyq balalar aýrýhanasynda 5 jasar bala qaıtys boldy

ATYRAÝ. KAZINFORM — Atyraý oblystyq balalar aýrýhanasynda 5 jasar bala qaıtys bolǵany anyqtaldy.

Atyraý oblystyq densaýlyq saqtaý basqarmasy baspasóz qyzmetiniń málimetinshe, 2019 jylǵy N.J. esimdi naýqas 2 aqpanda keshki saǵat 20:05–te aýrýhananyń qabyldaý bólimine jetkizilgen. 

— Jedel járdem brıgadasynyń kóligimen jetkizilgen balada qusý, júrek aıný, tábettiń tómendeýi jáne álsizdik bolǵan. Aýrýhananyń qabyldaý bóliminde kezekshi dárigerler naýqastyń jaǵdaıyn baǵalap, tıisti zerthanalyq taldaýlar júrgizdi. Keshendi medıtsınalyq kómek kórsetý maqsatynda pedıator mamany shaqyryldy. Patsıent pedıatrııa bólimshesiniń qarqyndy emdeý palatasyna jatqyzylyp, ınfýzıondy terapııa jasaldy, — dep habarlady basqarmanyń baspasóz qyzmeti.

Alaıda túngi mezgilde naýqastyń jaǵdaıy kúrt nasharlaǵan. Soǵan baılanysty kezekshi dárigerler jedel reanımatsııalyq sharalardy qolǵa alǵan. 

— Bala burynnan sozylmaly aýyr dertke shaldyqqan. Buǵan deıin birneshe ret respýblıkalyq deńgeıdegi klınıkalarda em qabyldap, zertteý qorytyndysymen sozylmaly aýrýy termınaldy kezeńge jetkendigi anyqtaldy. Dárigerler balanyń ómirin saqtaý úshin barlyq qajetti emdeý sharasyn qoldandy. Barlyq qajetti medıtsınalyq kómek tolyq kólemde kórsetildi. Alaıda júrgizilgen reanımatsııalyq sharalarǵa qaramastan, 2025 jylǵy 3 aqpanda túngi saǵat 00:40–ta bıologııalyq ólim tirkeldi, — dep málim etti basqarmanyń baspasóz qyzmetinen.

Eske sala keteıik, budan buryn Atyraý oblysynda byltyr 15-17 jastaǵy 127 jasóspirim júkti bolyp qalǵanyn habarlaǵan edik.