Atyraý oblystyq aýrýhananyń jóndeýi: eki jylda nebári 30% jumys oryndalǵan
ATYRAÝ. KAZINFORM – Atyraý oblystyq aýrýhanasynyń eski ǵımarattaryna júrgizilip jatqan kúrdeli jóndeý jumysy taǵy da sozyldy. Qazirgi ýaqytta jobalyq-smetalyq qujattamaǵa ózgerister engizilip jatqandyqtan, nysannyń qashan paıdalanýǵa beriletini ázirge belgisiz.
Oblystyq aýrýhana ǵımarattaryna kúrdeli jóndeý jumysy 2024 jyldyń qarashasynda bastaldy. Alǵashynda bul joba byltyr aıaqtalýy tıis edi. Keıin ýaqyty 2026 jyldyń tamyzyna shegerildi. Qurylystyń uzaqqa sozylýy turǵyndarǵa keri áserin tıgizip otyr. Óıtkeni, azamattar búginde medıtsınalyq kómekti ár jerden alýǵa májbúr.
Densaýlyq saqtaý basqarmasynyń aqparatyna súıensek, ótken jyly tamyzda jumys ýaqytsha toqtatylyp, jobalaý-smetalyq qujattamaǵa túzetý engizý úshin qaıta qaraýǵa jiberildi. Qujattamany zerdeleý barysynda ınjenerlik sheshimderge, jeldetý júıesine, ottegimen qamtamasyz etetin ortalyqtandyrylǵan júıege, sondaı-aq qazirgi zamanǵy medıtsınalyq mekemelerge qoıylatyn talaptarǵa sáıkes kelmeıtin birqatar fýnktsıonaldyq bólmege qatysty eskertý berilgen.
— Túzetýler bastapqy jobada anyqtalǵan eleýli kemshilikterge baılanysty engizildi. Atap aıtqanda, jobada medıtsınalyq mekemeniń zamanaýı sanıtarııalyq-epıdemıologııalyq talaptarǵa sáıkes tolyqqandy jumys isteýi úshin qajetti jumystardyń kólemi qarastyrylmaǵan. Qosymsha jumystardyń kólemi smetalyq esepke engizilip, Bıýdjet komıssııasynyń maquldaýynan ótti. Túzetilgen JSQ aqparattyq júıege júktelip, «Memsaraptama» ShJQ RMK-ǵa memlekettik saraptamadan ótkizý úshin joldandy, — dep málimdedi basqarma.
Qazirgi ýaqytta qurylys-montaj jumysynyń oryndalý deńgeıi 30%, bul qabyldaý aktilerimen rastalǵan. Jumystyń aıaqtalý merzimi jobanyń memlekettik saraptamanyń oń qorytyndysy alynǵannan keıin aıqyndalady.
Jobanyń jalpy quny — 3,6 mlrd teńge.
Qazirgi ýaqytta syrtqy ınjenerlik jelilerge qatysty jobalyq qujattama ázirlenip jatyr. Nysannyń negizgi ınjenerlik júıeleriniń úzdiksiz jumysyn qamtamasyz etý úshin rezervtik qýat kózderin qarastyrý máselesi qarastyrylyp jatyr.
Ákimdik kóp jyldan beri oblystyq aýrýhananyń jańa korpýsyn salýdy da josparlaǵan. Qazirgi ýaqytta jańa ǵımarat jobalanyp jatyr. Qujattyń qazirgi daıyndyq deńgeıi 25–30%. Jyl sońyna deıin jobalaý jumysyn aıaqtaý josparlanyp otyr.
Aıta keteıik, Atyraý oblystyq aýrýhanasy 1967, 1998 jáne 2002 jyldary salynǵan úsh ǵımarattan turady. Aýrýhananyń birqatar bólimshesi ýaqytsha Saryózek aýylyndaǵy modýldik ınfektsııalyq aýrýhanaǵa kóshirilgen. Al negizgi ǵımaratta ınsýlt ortalyǵy, travmatologııa, neırohırýrgııa, hırýrgııa bólimderi men sáýlelik dıagnostıka qyzmeti jumys istep tur.
Óńirde ózektiligin joǵaltpaǵan máseleniń biri — onkologııalyq dıspenserge jańa ǵımarat salý. Qazirgi ýaqytta bul jumysqa jaýapty merdiger mekeme anyqtalǵan.
