Atyraý oblysynyń Jylyoı aýdanynda mektepterdegi sabaq onlaın formatta ótedi

ATYRAÝ. KAZINFORM – Sý tasqynyna baılanysty Atyraý oblysynyń Jylyoı aýdanynda mektepterdegi sabaq onlaın formatta ótedi. Balabaqshalar ýaqytsha jabyldy. 

Jylyoı aýdanynda keshe, 4 sáýirde tasqyn sýdan tóngen qaýipke baılanysty tótenshe jaǵdaı jarııalandy. Jem ózenindegi sý deńgeıi kóterilip, Qaraǵaı eldi mekenine kirý qaýpi týyndady. Aýdan ortalyǵy – Qulsary qalasy men Maqat aýdanyndaǵy Dossor kenti aralyǵyndaǵy joldyń bir bóligin sý basty.

«Tótenshe jaǵdaıǵa baılanysty mektepter onlaın formatqa kóshirildi. Al, balabaqshalardy ýaqytsha jabýǵa sheshim qabyldandy», - dep habarlady Jylyoı aýdany ákimdiginiń baspasóz qyzmeti. 

Jylyoı aýdanynda jalpy orta bilim beretin 20 mektep bar. Bilim ordalarynda 18 830 oqýshy dáris alady. Sondaı-aq aýdanda mektepke deıingi tárbıe beretin 20 balabaqsha tirkelgen. Atalǵan mekemelerde 5 myń bala tárbıelenip jatyr. 

Eske salaıyq, buǵan deıin Atyraýdaǵy áskerı bólimniń qyzmetshileri Jylyoı aýdanyna kómekke kelgenin jazǵan edik. Sondaı-aq sý tasqynynan Jylyoı aýdanynda 5 kásipkerlik nysan, 1 shaqyrym jol búlingenin habarladyq.

Búgin 5 vagondy poıyz Qulsarydan Atyraýǵa jolaýshylardy tegin tasymaldaıdy.