Internet-alaıaqtarǵa atyraýlyqtar 400 mln teńge berip qoıǵan

ATYRAÝ. KAZINFORM — Atyraý oblysynda byltyr 747 ınternettegi alaıaqtyq qylmysy tirkelgen. Atyraýlyqtar alaıaqtarǵa 400 mln teńgege jýyq qarjysyn bergeni anyqtalyp otyr.

Oblystyq krımınaldyq polıtsııa basqarmasy kıber qylmysqa qarsy kúres tobynyń aǵa jedel ýákili Ashat Nurmanovtyń aıtýynsha, bank salasyna qatysty alaıaqtardy quryqtaýǵa qıyndyq týdyrǵan.

«Byltyr ınternettegi alaıaqtyqqa baılanysty 104 qylmystyq sotqa joldandy. Al, 276 qylmystyq is ózara kelisimge baılanysty qysqartyldy. Jábirlenýshilerdiń arasynda áleýmettik mártebesi ártúrli adamdar bar. Onyń ishinde bıýdjet salasynyń qyzmetkerleri, memlekettik qyzmetshiler, zeınetkerler, tipti jeke kásipkerler de bar. Ótken jyly alaıaqtar atyraýlyqtarǵa shamamen 400 mln teńgege jýyq shyǵyn keltirdi»,- deıdi Ashat Nurmanov.

Onyń aıtýyna qaraǵanda, eń jıi kezdesetin aldaý túri – ınternet arqyly «joq taýarlardy» satý nemese qyzmet kórsetý kezinde aldyn ala tólem alý. Bank qyzmetkerleriniń atynan qońyraý soǵatyn alaıaqtar da kóp. Onlaın-qaryzdardy resimdeý arqyly jasalatyn qylmystyń úlesi úshinshi orynda tur. Sondyqtan, quqyq qorǵaýshylar turǵyndarǵa árqashan saq bolý qajettigin, kez-kelgen qońyraý men habarlamaǵa aldanyp qalaý kerektigin eskertedi.

Eske sala ketelik, buǵan deıin Atyraýda 27 jastaǵy jigit turǵyndardy áıel daýsymen aldaǵanyn habarlaǵan bolatynbyz.