Atyraý oblysynyń sý aıdyndarynda 46 orynda shomylýǵa ruqsat beriledi
ATYRAÝ. KAZINFORM — Atyraý oblysynda jazǵy shomylý maýsymynda ózen-kólderdegi 46 orynda sýǵa túsýge bolady.
Atyraý oblystyq tótenshe jaǵdaılar departamenti azamattyq qorǵanys basqarmasynyń aǵa ofıtseri Daryn Ánýarbekovtiń aıtýynsha, turǵyndar shomylýǵa jıi baratyn birneshe sý aıdyny bar. Bul — Jaıyq, Qıǵash, Oıyl, Saǵyz, Sharon ózenderi men Qamyskól kóli, sondaı-aq Kasparkın kanaly.
— Atyraý oblysy ákimdiginiń 2023 jylǵy 11 sáýirdegi № 51 qaýlysyna sáıkes turǵyndardyń demalýyna, shomylýyna arnalǵan 46 oryn bekitildi. Bul ýchaskeler Atyraý qalasy men jeti aýdan aýmaǵynda ornalasqan. Ár ýchaske turǵyndardyń qaýipsizdigin qamtamasyz etý talaptaryna sáıkes jabdyqtalyp jatyr. Turǵyndar jıi shoǵyrlanatyn oryndarda LED ekrandar men dybystyq habarlaý júıesi arqyly sýdaǵy qaýipsizdik erejeleri túsindiriledi. Shomylýǵa tyıym salynǵan oryndar 2gis mobıldi qosymshasyna júkteldi, — dep habarlady Daryn Ánýarbekov.
Onyń aıtýyna qaraǵanda, balalardyń qaýipsizdigine basa kóńil bólinip otyr. Shomylý maýsymy qarsańynda mektepke deıingi jáne orta bilim berý mekemelerinde arnaıy túsindirý sabaqtary ótkizilgen. Ata-analarǵa qaýipsizdik týraly beınematerıaldar joldanyp, WhatsApp toptary arqyly aqparat taratylǵan.
— Kún saıyn jedel-qutqarý jasaǵy men jergilikti polıtsııa qyzmetkerlerinen quralǵan patrýldik toptar kezekshilikke shyǵady. Qyzmetkerlerdiń daıyndyǵy men tehnıkalyq jaraqtandyrylýy baqylaýǵa alyndy. Turǵyndar nazaryn arnaıy jabdyqtalǵan oryndarda ǵana shomylýǵa, qaýipsizdik erejelerin qatań saqtap, balalardy qaraýsyz qaldyrmaýǵa aýdarǵymyz keledi. Zań talaptaryn buzyp, tyıym salynǵan oryndarda shomylǵan nemese mas kúıde sýǵa túskender QR Ákimshilik quqyq buzýshylyq týraly kodeksiniń 412-babyna sáıkes jaýapkershilikke tartylatynyn eskertemiz, — dep málim etti Ánýarbekov.
Eske sala keteıik, budan buryn Atyraýda byltyrǵy qazanda joǵalǵan boıjetkendi Jaıyqtan izdeý qaıta jalǵasqanyn jazǵan edik.