Atyraý oblysynyń sharýalary 9,6 myń gektar alqapqa egin egedi

ATYRAÝ. KAZINFORM – Bıyl Atyraý oblysynda 240 sharýashylyq qurylymy men jeke sektorda 9 653,7 gektarǵa egin egý josparlanyp otyr.

Atyraý oblysy ákiminiń baspasóz hatshysy Rýslan Jumaǵazıevtiń málimetine súıensek, onyń ishinde 638,7 gektarǵa kartop, 3070 gektar alqapqa kókónis, 1415 gektarǵa baqsha daqyldary ósiriledi. Al, 4530 gektarǵa mal azyqtyq daqyldyń dáni sebiledi. 

– Osy kezge deıin josparlanǵan egistik kóleminiń 9553,7 gektar jeri jyrtyldy. Sharýalar 2680,5 gektaryna kartop, kókónis, baqsha jáne mal-azyqtyq daqyldar tuqymyn septi. Endi mamyr aıyn deıin 100 gektar tolyǵymen jyrtylady, - dep habarlady Rýslan Jumaǵazıev.

Onyń deregine qaraǵanda, jer jyrtý, egin egý jumystaryna 780 tehnıka tartylǵan. Onyń ishinde 450 traktor, 330 aýyl sharýashylyǵyna qoldanylatyn arnaıy mashınalar men sý nasostary bar.

– Bıyl sheteldik azamattardy maýsymdyq aýyl sharýashylyǵy jumystaryna tartý úshin 680 kvota bólindi. 1 sáýirge deıin 355 sheteldikke ruqsat berilip, jumysqa tartyldy, -dep málim etti Rýslan Jumaǵazıev.

Eske sala ketelik, budan buryn Atyraý oblysynyń turaqtandyrý qorynda 400 tonna kókónis baryn habarlaǵan edik.