Atyraý oblysynyń shalǵaıdaǵy aýdanynda órt sóndirý bóliminiń deposy ashyldy

ATYRAÝ. KAZINFORM – Atyraý oblysynyń shalǵaıdaǵy Qyzylqoǵa aýdanynda órt sóndirý bóliminiń jańa deposy ashyldy.

Jańadan ashylǵan №10 órt sóndirý bóliminiń jańa deposy aýdan ortalyǵy – Mııaly aýylynda ornalasqan. Onyń ashýlyna Tótenshe jaǵdaılar mınıstri, general-maıor Shyńǵys Árinov, Atyraý oblysynyń ákimi Serik Shápkenov qatysty.

Mınıstrdiń pikirinshe, órt sóndirý bóliminiń jańa nysanyn salý men jaraqtandyrý Memleket basshysynyń tapsyrmasyna sáıkes mınıstrlik qolǵa alǵan reformanyń nátıjesinde múmkin bolǵan. Bul bólim qaýipsizdik júıesin jaqsartýǵa yqpal etedi. 

«Qazir mınıstrlik aýyldardaǵy órt sóndirý bólimderiniń jumysyn jetildirýge basymdyq berip otyr. Sonyń nátıjesinde órt sóndirý bólimderi eń zamanaýı tehnıkamen jaraqtandyryla bastady. Órt sóndirý salasyndaǵy qyzmetkerlerdiń áleýmettik jáne turmystyq jaǵdaıyn jaqsartýǵa kóńil aýdaryp otyr. Nysandardy jóndeý jáne jańǵyrtý jumystary júrgizilip jatyr. Bul órt sóndirý deposy aýyl turǵyndary úshin qaýipsizdikti qamtamasyz etýdiń úlgisi bolatynyna senimdimin», - dedi Shyńǵys Árinov.

Atyraý oblysynda 14 órt sóndirý bólimi bar. Al, Qyzylqoǵa aýdanyndaǵy №10 órt sóndirý bólimi ornalasqan eski ǵımarat 1976 jyly salynǵan. Qazir órt sóndirý bóliminde 30 adam jumys isteıdi. Osy kezge deıin 3 arnaıy tehnıka bolǵan.

Al, jańa nysanda baılanys pýnkti, oqytý zaly, ashana, basshylyq quramǵa arnalǵan, kezekshiler tynyǵatyn bólmeler bar. Avtokólikterge tehnıkalyq qyzmet kórsetý, órt sóndirý jabdyqtary jáne qural-jabdyqtar qoımasymen jabdyqtalǵan. Bólimge jańadan 5 thehnıka berildi. 

Atyraý oblysynyń ákimi Serik Shápkenovtiń aıtýynsha, Qyzylqoǵa aýdanyndaǵy Tasshaǵyl aýylynda taǵy bir órt sóndirý deposynyń nysany salynyp jatyr. 

«Bıyl Atyraý oblystyq tótenshe jaǵdaılar departamentiniń avtoparki jańa 56 tehnıkamen jańartyldy. Jergilikti bıýdjet qarjysyna salynyp, jańadan ashylǵan órt sóndirý deposy nysanynyń aýmaǵynda bir qyzmettik páter bar. Óńirdegi tóteenshe jaǵdaılardyń aldyn alatyn sala qyzmetkerlerine qoldaý kórsetý jalǵasa beredi», -deıdi Serik Shápkenov. 

Eske sala ketelik, buǵan deıin Atyraý oblysynda kóktemgi sý tasqynyna daıyndyq qalaı júrip jatqanyn jazǵan bolatynbyz.