Atyraý oblysynyń oqýshylary jazǵy 3 saýyqtyrý lagerinde demalady

ATYRAÝ. KAZINFORM – Bıyl Atyraý oblysynda 134 myń 812 balany jazǵy demalyspen qamtý josparlanyp otyr.

Atyraý oblystyq bilim basqarmasynyń ókili Qadyrjan Saparovtyń aıtýynsha, mektepter janynan 727 jazǵy lager ashylady. Oǵan 120 myńǵa jýyq bala tartylady. 

– Jaz mezgilinde oqýshylardy 3 saýyqtyrý lagerine demalýǵa jiberý kózdelip otyr. Onyń biri – Reseı Federatsııasynyń Jeleznovodsk qalasyndaǵy «Qazaqstan Geologi» emdeý pansıonaty. Oǵan arnaıy sanatta engen otbasylardaǵy 1530 balanyń demalysy uıymdastyrylaly. Al Inder men Mahambet aýdanynda lagerlerde demalatyn oqýshylardyń sany 1500-ge jýyqtaıdy, -deıdi Qadyrjan Saparov. 

Onyń aıtýyna qaraǵanda, áleýmettik turmysy tómen otabsylardaǵy balalar erekshe nazarǵa alynady. 

– Jetim, ata-ana qamqorlyǵynsyz qalǵan, arnaıy sanattaǵy jáne qolaısyz otbasylardaǵy, quqyq qorǵaý organdarynyń esebinde turǵan balalar jazǵy demalyspen tolyqtaı qamtylmaq. Jaz mezgilinde oblystaǵy barlyq mýzeı arnaıy sanattaǵy balalar úshin tegin qyzmet kórsetedi.

Respýblıkalyq bıýdjet esebinen 4 lagerge 608 balany, jergilikti bıýdjet tarapynan 100-den astam oqýshyny elimizdiń sakraldy, tarıhı, kórikti mekenderine ekskýrsııa uıymdastyrý josparlanyp otyr, -dep málim etti Qadyrjan Saparov.

Qazir maýsymdyq lagerge sanıtarııalyq-epıdemıologııalyq qorytyndy alý úshin abattandyrý, aǵymdaǵy jóndeý jumysy júrgizilip jatyr. 

Eske sala ketelik, buǵan deıin jazǵy demalys kezinde oqýshylardyń qaı sanattary tegin ońaltýdan ótetini habarlanǵan edi.