Atyraý oblysynyń Muqyr aýylynda tasyǵan saı sýy 40 úıge qaýip tóndirýi múmkin

ATYRAÝ. KAZINFORM — Atyraý oblysynyń Muqyr aýylynda erigen qar sýy saıǵa quıylyp, tasyp jatyr. Saıǵa jaqyn ornalasqan 40 úıge qaýip tónýi múmkin.

Qyzylqoǵa aýdandyq memlekettik quqyqtyq, jumyldyrý daıyndyǵy jáne tótenshe jumystar jónindegi bólim basshysy Azamat Qalenovtiń aıtýynsha, Muqyr aýylyndaǵy saıdyń eki jaǵynda 190 úı ornalasqan. 

«Bul — Muqyrdaǵy №6 aýylda ornalasqan saı. Búgin, 9 aqpanda jergilikti ýaqytpen saǵat 9:00 shamasynda saıǵa erigen qar sýy tolǵany týraly aqparat tústi. Saı boıynda 6 sý ótkizgish qubyry salynǵan. Alaıda, qatty qarqynmen júrip jatqan sý qubyrlardan ótip úlgere almaı, jol ústimen aǵyp jatyr. Saı boıymen aǵyp jatqan sýdyń eni — 12 metr. Qar sýy 40 úıge qaýip tóndirýi múmkin degen esep bar. Sol sebepten, Muqyr aýyldyq okrýgi ákiminiń apparaty turǵyn úıler men qora-jaılardy qar sýynan saqtap qalý úshin iske kirisip, 15 adamdy, 2 júk kótergish, 1 Gıdromek traktory men 1 KamAZ kóligin jumyldyrdy», - dep habarlady Azamat Qalenov. 

Onyń aıtýyna qaraǵanda, Saǵyz aýyldyq okrýgine qarasty Kenbaı eldi mekenindegi saıda da qar sýy júrip, 2 turǵyn úıge qaýip tóndirgen. Eldi mekenge «Qaınarmunaıgaz» munaı-gaz óndirý basqarmasynan 1 júk kótergish tehınkasy jiberilip, túngi saǵat 04:30- da turǵyn úılerdiń aınalasyna bóget salynǵan. 

Al, Saǵyz aýylyndaǵy Noǵaıty ózeniniń tereńdegi shamamen — 3 metr. Qazir sý deńgeıi ózen arnasynyń tabanynan 1 metrge kóterilgen. 

«Qazir Saǵyz aýylynda 2 KamAZ sý soryp jatyr. Sýdan qorǵaý jumystaryna 60 adam,1 júk kótergish, 1 Gıdromek traktory tartyldy», -dedi Azamat Qalenov.

Eske sala ketelik, buǵan deıin Atyraý oblysynda Noǵaıty ózeniniń arnasy kóterilip, taǵy bir aýylda saı tasyp jatqanyn jazǵan bolatynbyz.