Atyraý oblysynyń Muqyr aýylynda bir jigitti top bolyp urǵandar qamaýǵa alyndy
ATYRAÝ. KAZINFORM – Atyraý oblysyndaǵy Muqyr aýylynda birneshe jigit bir er adamdy tepkiniń astyna aldy. Osyǵan baılanysty 4 kúdikti ustalyp, qamaýǵa alyndy.
Tóbelestiń vıdeosy áleýmettik jeli men WhatsApp jelisinde taraldy. Qyzylqoǵa aýdanynda ornalasqan Muqyr aýylyndaǵy tóbeles 2 maýsymda bolǵan.
Atyraý oblystyq polıtsııa departamentiniń baspasóz qyzmeti tóbeleske qatysqan 4 kúdiktiniń ustalǵanyn rastady.
– Áleýmettik jelide taraǵan beınejazbadaǵy tóbeleske qatysyp, quqyq buzýshylyq jasaǵan barlyq kúdikti anyqtaldy. Kúdiktiler qamaýǵa alyndy. Qazir QR Qylmystyq kodeksiniń 293-babynyń 3-bóligimen (Buzaqylyq) qylmystyq is qozǵaldy. Kúdiktilerge qatysty keshendi tergeý amaldary júrgizilip jatyr. Ózge aqparat tergeý múddesine sáıkes jarııalaýǵa jatpaıdy, -dep habarlady departamenttiń baspasóz qyzmeti.
Alaıda, tóbelesten zardap shekken jábirlenýshi aryz jazbaǵan. Jábirlenýshi aýrýhanaǵa da júginbegen.
Eske sala ketelik, budan buryn Atyraý oblysyndaǵy atystan 3 adam jaraqat alyp, aýrýhanaǵa jetkizilgenin habarlanǵan bolatynbyz.