Atyraý oblysynyń mektepterine 1 myń ınteraktıvti taqta satyp alyndy
ATYRAÝ. KAZINFORM – Atyraý oblysynyń mektepteri úshin 1 myń ınteraktıvti taqta satyp alyndy. Qazir bilim ordalaryndaǵy mundaı taqtalar sany 2 myńǵa jýyqtady.
Atyraý oblystyq bilim basqarmasynyń basshysy Marat Ábýovtiń aıtýynsha, ınteraktıvti panelder 7 aýdan men oblys ortalyǵynda ornalasqan bilim ordalaryna taratylyp jatyr.
«Interaktıvti taqtalardyń 500 danasy Atyraý qalasyndaǵy mektepterge ornatylady. Al, Inder aýdanyna osyndaı 45 taqta jiberiledi. Isataı men Mahambet aýdanyna 60 danadan beriledi. Qurmanǵazy aýdanyna 57, Qyzylqoǵaǵa – 56, Jylyoıǵa – 50, Maqat aýdanyndaǵy mektepterge 39 taqta jetkiziledi. Gımnazııa men lıtseılerdegi bilim ordalaryna 83, tehnıkalyq bilim beretin kolledjderge 50 taqta berý kózdelip otyr», -dep habarlady Marat Ábýov.
Onyń aıtýyna qaraǵanda, Inder jáne Mahambet aýdanyndaǵy, oblystyq gımnazııa men lıtseılerdegi ınteraktıvti panel tapshylyǵy máselesi tolyqtaı sheshilgen.
«Jalpy ınteraktıvti taqta bilim berý protsesiniń qyzyqty ári tartymdy ótýine múmkindik beredi. Onyń kómegimen muǵalim túrli oqý materıalyn vıdeomen kórsetip, 3D formatty qoldana alady. Bul balalarǵa qajetti aqparattyń jeńil ári túsinikti jetkizilýin qamtamasyz etedi. Muǵalimniń ashyq sabaqty onlaın formatta ótkizýine múmkindik bar», -dep málim etti Marat Ábýov.
Eske sala ketelik, budan buryn Atyraýda «Jaıly mektep» jobasymen alǵashqy eki bilim ordasy ashylǵanyn jazǵan bolatynbyz.
