Atyraý oblysynyń Inder aýdanyna jańa ákim taǵaıyndaldy
ATYRAÝ. KAZINFORM – Atyraý oblysynyń ákimi Serik Shápkenovtiń ókimimen QR Prezıdenti Ákimshiligi jáne aýdandyq máslıhattyń kelisimimen Inder aýdanynyń ákimi laýazymyna Serik Nysanbaev taǵaıyndaldy.
Serik Baǵytjanuly 1980 jyly Atyraý oblysynda dúnıege kelgen. H.Dosmuhamedov atyndaǵy Atyraý memlekettik ýnıversıtetin «quqyqtaný» mamandyǵymen bitirgen.
Eńbek jolyn 2003 jyly Atyraý qalasy ákiminiń apparaty memlekettik-quqyqtyq jáne áskerı jumyldyrý jumys bóliminiń bas mamany bolyp bastaǵan.
2008-2017 jyldary Atyraý qalalyq ákimi apparaty memlekettik-quqyqtyq jumys bóliminiń, 2017-2022 jyldary aralyǵynda Atyraý qalasy ákimi apparatynyń basshysy bolǵan.
Al 2022 jyldan osy taǵaıyndaýǵa deıin Atyraý qalasy ákiminiń orynbasary laýazymyn atqaryp keldi.
Eske sala ketelik, buǵan deıin Daryn Shamuratov Atyraý oblysy ákiminiń orynbasary bolyp taǵaıyndalǵanyn habarlaǵan bolatynbyz.