Atyraý oblysynyń eki aýdanynda 34 487 saılaýshy daýys beredi
Atyraý oblysynyń Isataı jáne Qyzylqoǵa aýdanynda ákim saılaýy ótip jatyr. Eki aýdanda 34 487 saılaýshy daýys beredi, dep habarlaıdy Kazinform.
Atyraý oblystyq aýmaqtyq saılaý komıssııasynyń tóraǵasy Azamat Aımanakýmovtyń málimetinshe, Isataı aýdanyndaǵy ákim saılaýy 15 ýchaskede ótip jatyr. Mundaı 15 883 saılaýshy tańdaýyn jasaıdy. Al Qyzylqoǵa aýdanyndaǵy 19 saılaý ýchaskesinde 18 614 saılaýshy tirkelgen.
– Eki aýdandaǵy ákim saılaýynda 34 487 saılaýshy daýys beredi. Bul oblystaǵy saılaýshylardyń jalpy sanynyń 8,5 paıyzyn quraıdy. Eki aýdan ákiminiń saılaýyna 6 úmitker tirkeldi. Úmitkerlerdiń bári memlekettik qyzmette jumys isteıdi, -dep habarlady Azamat Aımanakýmov.
Aýdandardaǵy saılaý ýchaskelerinde múmkindigi shekteýli jandardyń kedergisiz daýys berýine qolaıly jaǵdaı jasalǵan. Máselen, Isataı aýdanyndaǵy saılaý ýchaskeleriniń bárinde, al, Qyzylqoǵa aýdanynda 16 saılaý ýchaskesinde pandýs ornatylǵan. Saılaý ýchaskeleri taktıldi jolaq, monoblok pen qulaqqap, braıl shrıft, lýpa sekildi quraldarmen qamtylǵan.
Eske sala ketelik, budan buryn Atyraý oblysynda eki aýdan ákiminiń laýazymyna 6 kandıdat talasatynyn habarlaǵan bolatynbyz.
Eki aýdan ákiminiń laýazymyn ıelenýge nıetti 6 úmitkerdiń ekeýi «AMANAT» partııasynan usynylǵan. Qazaqstan halyq partııasy saılaý dodasyna bir úmitkerin qosty. Al, úsh kandıdat ózin-ózi usynǵan.
Úmitkerdiń biri aýdandyq máslıhattyń tóraǵasy, biri aýdan ákiminiń orynbasary, endi biri aýdan ákimi bolyp jumys isteıdi. Úsh úmitker aýyldyq okrýgtiń ákimi laýazymyn atqarady.
