Atyraý oblysynyń damýyna erekshe mán berý kerek - Memleket basshysy
ASTANA. KAZINFORM - Memleket basshysy Ulttyq quryltaıdyń úshinshi otyrysynda Atyraý jurtshylyǵy oblystyń ekologııalyq ahýalyna alańdap otyrǵanynan habardar ekenin, qalada káriz júıesin, sý qubyryn salýdyń mańyzdylyǵyn, ınfraqurylym ábden eskirgenin, sonyń kesirinen jerasty sýlary jáne Jaıyq ózeni lastanyp jatqanyn aıtty.
«Men jýyrda Prezıdenttik jastar kadr rezerviniń múshelerimen arnaıy kezdestim. Sonda aıtqan oıymdy elimizdiń barsha jastaryna taǵy da qaıtalaǵym keledi. Qazaqstannyń bolashaǵy – sizderdiń qoldaryńyzda. Kóp uzamaı memleketti basqarý isi, ıaǵnı, el tizgini búgingi jastardyń qolyna ótedi. Sizder osy jaýapkershilikti qazirden bastap sezinýlerińiz qajet. Ózderińizge júkteletin tarıhı mıssııany oryndaýǵa qashanda daıyn bolýlaryńyz kerek. Biz jasampaz halyq bolýymyz qajet. Oǵan áleýetimiz tolyq jetedi. San ǵasyrlyq tarıhynda qazaq memlekettiginiń qurylymy talaı ret ózgerdi. Biraq eldigimizdiń tuǵyry qashanda – berik, ultymyzdyń rýhy – árdaıym asqaq. Biz ozyq oıly ult retinde tek qana alǵa umtylýymyz kerek. Ónimdi eńbek etip, sapaly bilim alyp, ortaq maqsatqa jumyla bilýimiz qajet. Sonda bolashaǵy jarqyn, qýatty memleketti birge quramyz», - dedi Prezıdent.
Memleket basshysy Atyraý oblysynyń damýyna erekshe mán berý keregin, ásirese qaladaǵy qoqys polıgonyn dereý retke keltirýi qajet ekenin tilge tıek etti.
«Ulttyq quryltaı jumysy júıeli, mańyzdy qoǵamdyq ınstıtýt retinde qalyptasty. Quryltaı músheleri naǵyz eldik máselelerdi kóteretin «birtutas komandaǵa» aınalýǵa tıis. Sizder jumys barysynda kóptegen utymdy usynys berip júrsizder. Birqatar bastama júzege asyrylyp jatyr. Búgin de jańa ıdeıalar aıtyldy. Onyń bári muqııat qaralyp, mańyzdy usynystar boıynsha naqty sharalar qolǵa alynady. Quryltaı barynsha tıimdi ári ońtaıly qyzmet etip jatyr dep sanaımyn. Aldaǵy ýaqytta da belsendi jumysty jalǵastyra bergen jón. Ózderińiz bilesizder, men osy basqosýǵa aımaq ókilderin shaqyrý týraly tapsyrma berdim. Búgin, mine, ortamyzda atyraýlyq aǵaıyndar da otyr. Sonyń ishinde ekologııa máselelerin kóterip júrgen belsendi azamattar bar. Jalpy Atyraý jurtshylyǵy oblystyń ekologııalyq ahýalyna alańdap otyrǵanyn bilemin. Qalada káriz júıesin, sý qubyryn salý óte mańyzdy. Infraqurylym ábden eskirgen. Sonyń kesirinen jerasty sýlary jáne Jaıyq ózeni lastanyp jatyr. Oblys ortalyǵynda qoqysty suryptaýǵa jáne óńdeýge qatysty túıtkilder bar. Atyraýda qoqys suryptaıtyn keshen salynǵan. Ákimdik ony jaqyn arada iske qosýǵa tıis. Sondaı-aq qoqys polıgonyn dereý retke keltirýi qajet. Bul máseleler mindetti túrde óz sheshimin tabýy kerek. Qazir osyǵan baılanysty naqty jumys jasalyp jatyr. Úkimetke jáne oblys ákimdigine bul mańyzdy jumysty aıaǵyna deıin jetkizýdi tapsyramyn. Bul másele meniń baqylaýymda bolady. Jalpy Atyraý oblysynyń damýyna erekshe mán berý kerek. Sondyqtan Úkimet pen ákimdik arnaıy jospar boıynsha jumys isteıdi», - dep atap ótti Qasym-Jomart Toqaev.
Sondaı-aq Prezıdent Atyraýdaǵy Onkologııa ortalyǵyn salýǵa jer qoınaýyn ıgerýmen aınalysatyn kásiporyndar qarjy bóletinin habarlady.
«Men kezinde Atyraýda Onkologııa ortalyǵyn salý týraly tapsyrma berdim. Biraq, qarjy máselesi tolyq sheshilmeı, sozylyp ketti. Endi oǵan jer qoınaýyn ıgerýmen aınalysatyn kásiporyndar qarjy bóletin boldy. Qurylys kelesi jyly aıaqtalady. Sondaı-aq, oblys ákiminiń aıtýynsha, Radıologııa korpýsynyń qurylysyn qarjylandyrý máselesi de sheshimin tapty. Bul nysan jyl sońyna deıin salynyp bitedi. Osy jobalarǵa demeýshilik kórsetken azamattarǵa jáne kompanııalarǵa rızashylyǵymdy bildiremin. Budan bólek, bıyl birneshe emhana, ońaltý (reabılıtatsııa) ortalyǵy jáne basqa da áleýmettik nysandar paıdalanýǵa beriledi», - dedi Memleket basshysy.
