Atyraý oblysynyń birneshe eldi mekeninde elektr jaryǵy sónip qaldy

Atyraýda 28 jeltoqsanda kún buzylyp, sekýndyna 28 metr jyldamdyqpen jel soqty. Sonyń saldarynan keshe munaıly shahar men Qurmanǵazy aýdanynyń birneshe eldi mekeninde turǵyndar jaryqsyz qaldy, dep Kazinform.

Oblys ákimi baspasóz qyzmetiniń málimetinshe, tabıǵat qubylysynyń saldarynan Atyraý qalasyna taıaý ornalasqan Aqsaı, Besikti, Talǵaırań, Zaroslyı, Qyzylbalyq, Bereke, Balyqshy, Kókarna, Damby, Zaroslyı, Aqjar, Birlik sekildi 12 eldi meken men «Samal», «Almagúl», «Qaraózek», «Eski áýejaı», shaǵyn aýdandaryndaǵy jeke turǵyn úı alabynda elektr jaryǵy óshken. Qurmanǵazy aýdanynyń Úshtaǵan, Asan, Jalpaq eldi mekenderindegi elektr jelisinen aqaý shyqqan.

Osyǵan baılanysty oblys ákimi Serik Shápkenov jedel shtabtyń otyrysyn ótkizip, sala mamandaryn elektr jelisindegi apattyń saldaryn joıýǵa jumyldyrdy. Jaryqtyń óshkeni týraly 40-tan astam turǵynnan shaǵym túsken.

«Atyraý Jaryq» AQ-nyń arnaıy brıgadasy apattyń saldaryn joıýǵa kiristi. Elektr jaryǵy keshe, 28 jeltoqsanda jergilikti ýaqytpen 23:50-de berile bastady. Al, búgin, 29 jeltoqsanda saǵat 03:20-da elektr jaryǵy tolyq berildi.

«Apatty joıý úshin 22 jedel brıgada jumys istedi. Onyń ishinde Atyraý qalasynda 14, aýdandarda 8 brıgada bar. Barlyq materıaldyq resýrs pen arnaıy tehnıka jumyldyryldy. Qazir apatty tolyq joıý úshin barlyq is-shara qolǵa alyndy», -dep habarlady oblys ákiminiń baspasóz qyzmeti.

Eske sala ketelik, budan buryn Atyraý qalasy men úsh aýdanda jaryq sónip qalǵanyn habarlaǵan edik.