Atyraý oblysynyń ákimdigi 2015-2023 jyldary 26,3 mlrd teńge nesıe alǵan

ATYRAÝ. KAZINFORM — Atyraý oblysynyń ákimdigi 2015-2023 jyldary mınıstrliktermen 32 nesıelik kelisimshartqa jasaǵan. Nesıelik kelisimsharttar men qosymsha kelisimsharttarǵa sáıkes zaım somasy 26 mlrd 308,9 mln teńgeni quraǵan.

несие
Фото: freepik.com

Atyraý oblystyq ekonomıka jáne qarjy basqarmasy basshysynyń orynbasary Elmıra Qurmanovanyń málimetinshe, 2023 jyldyń 31 jeltoqsanyna deıin 4 zaım qarjysy tólengen. Al 2024 jyldyń 1 qańtarynda nesıelik qaryz somasy 22 mlrd 462,7 mln teńgeni quraǵan.

— 2025 jyldyń 1 qańtaryna nesıelik kelisimsharttar boıynsha respýblıkalyq bıýdjetke qaryz joq. Mindettemege sáıkes qaryz kestemen tólenedi, — deıdi Elmıra Qurmanova.

Onyń málimetine súıensek, 8 mlrd 369,6 mln teńge jylý, sýmen qamtý, sý burý jelilerin jańǵyrtý jáne qurylysyn júrgizýge bólingen. Al nátıjeli jumyspen qamtýdy jáne jappaı kásipkerlikti damytýǵa 5 mlrd 457,4 mln, kondomınıým nysandarynyń ortaq múlkin kúrdeli jóndeýge 2 155,6 mln teńge qaralǵan.

Sondaı-aq aýyl turǵyndarynyń kirisin arttyrý jobasyn keńeıtý úshin shaǵyn nesıege 1 mlrd 504,0 mln, mamandardy áleýmettik qoldaýǵa 1 mlrd 461,5 mln, aýyldyq eldi mekender men shaǵyn qalalarda shaǵyn nesıe berýge 1 mlrd 295,9 mln teńge kózdelgen.

Al monoqaladaǵy kásipkerlikti damytýǵa járdemdesýge 1 mlrd 245,1 mln, turǵyn úıdi jobalaý nemese salýǵa 1 mlrd 142,1 mln, 2020-2021 jyldarǵa arnalǵan Jumyspen qamtý jol kartasy aıasynda kásipkerlik bastamalardy iske asyrýǵa 1 mlrd teńge berý josparlanǵan. Óńirdegi jastardyń kásipkerlik bastamalaryn qoldaýǵa 930 mln teńge qaralǵan.

— Bıýdjettik nesıe qarjysyn maqsatsyz ne tıimsiz paıdalaný deregi anyqtalǵan joq, — dep málim etti Elmıra Qurmanova.

Eske sala keteıik, budan buryn Atyraýda kompanııalarǵa salynǵan 42 mlrd teńge aıyppuldyń 26 mlrd teńgesi óndirilgenin habarlaǵan bolatynbyz.

Сейчас читают