Atyraý oblysynyń ákimi Mahambet aýdanynda tasqyn qaýpi joǵary eldi mekenderdi aralady

ATYRAÝ. KAZINFORM – Aımaq basshysy Serik Shápkenov Taldykól, Saraıshyq, Mahambet, Sarytoǵaı jáne Aqjaıyq aýyldyq okrýgterindegi bógetterdi nyǵaıtý jáne ony kúsheıtý jumystaryn tekserdi. 

«Oblys ákimi nópir sýdy eldi mekenderden qaýipsiz ótkizý týraly tapsyrma berdi. Osylaısha respýblıkalyq mańyzy bar Atyraý-Oral tas jolynan (72 km) sý ótkizý týraly sheshim qabyldandy. Bul baǵytta qatynaıtyn aýyr júk kólikteriniń qozǵalysy toqtatylady. Jeńil avtokólikter oblystyq mańyzy bar Atyraý-Inder tas joly boıymen júredi», — delingen habarlamada.

Óńir basshysy Serik Shápkenov jumystarmen tanysqan soń aýdan ákimine bóget boıyndaǵy kezekshilikti kúsheıtip, qajetti tehnıkalarmen, janar-jaǵarmaımen jáne azyq-túlikpen qamtýdy tapsyrdy.

Mahambet aýdanynda tasqynnyń aldyn alý úshin salynǵan bógetteriniń uzyndyǵy — 105,8 km.