Atyraý oblysyndaǵy janarmaı stansalarynda qandaı kemshilikter bar
ATYRAÝ. KAZINFORM — Atyraý oblysyndaǵy janar-jaǵar maı stansalarynda órt qaýipsizdigine baılanysty birneshe kemshilik anyqtalyp otyr. Alaıda, ónerkásiptik qaýipsizdigine tekserý júrgizilmegen.
Atyraý oblysynyń turǵyndary Qulsary qalasyndaǵy janar-jaǵarmaı stansayndaǵy órtten soń qaýipsizdik máselesine alańdaı bastady.
Osyǵan baılanysty Kazinform tilshisi Atyraý oblystyq energetıka jáne turǵyn úı-kommýnaldyq sharaýshylyq basqarmasyna «Janar-jaǵarmaı jáne gaz quıý stansalarynyń qaýipsizdigi sońǵy ret qashan tekserilgen?» degen saýalmen júgingen edi.
— Atyraý oblysynda 34 mekeme ishki naryqty suıytylǵan gazben qamtıdy. Bul mekemeler 101 beketke ıelik etedi. Oblys aýmaǵynda 125 janar-jaǵarmaı beketi ornalasqan. Basqarma kúndelikti otyn baǵasyna, qordaǵy qaldyqqa ǵana monıtorıng júrgizilip otyrady, — dep aqparat berdi basqarmadan.
Oblys ákimdigi baspasóz qyzmetiniń málimetine súıensek, munaıly shaharda 56 gaz quıý beketi bar. Óńirdegi 7 aýdanda osyndaı 45 beket ashylǵan.
Atyraý oblystyq tótenshe jaǵdaılar departamenti bastyǵynyń orynbasary Syrym Jaımaǵambetovtiń aıtýynsha, ónerkásiptik qaýipsizdik jáne memlekettik órt baqylaý talaptaryna sáıkes qoldanylatyn krıterııler bar.
Atyraý qalasynda 36 janar-jaǵarmaı jáne gaz quıý stansasy tirkelgen.
— Janarmaı stansalary Qazaqstannyń qurylys normalary standartyna sáıkes jobalanyp, qurylysy salynady. Standartqa sáıkes avtojanarmaı jáne gaz quıý stansalary men turǵyn úılerdiń ara qashyqtyǵy 60 metr bolýy tıis, — dedi Syrym Jaımaǵambetov.
Onyń aıtýynsha, 2020-2024 jyldary janarmaı jáne gaz quıý stansalarynyń qaýipsizdigine tekserý júrgizý múmkin bolmaǵan. Munyń birneshe sebebi bar.
— Janar-jaǵarmaı stansalarynyń qaýipsizdigi máselesin qozǵaǵanda birinshiden Kásipkerlik kodeksiniń 85-2-baby 5-tarmaǵy basshylyqqa alynady. Ekinshiden, 2020-2024 jyldary moratorıı jarııalanýyna, Investıtsııalar jáne damý mınıstriniń 2015 jylǵy 15 jeltoqsandaǵy jáne Ulttyq ekonomıka mınıstriniń 2015 jylǵy 28 jeltoqsandaǵy birlesken buıryǵy bar. Osylardyń negizinde janar-jaǵarmaı stansalarynyń qaýipsizdigin tekserý múmkin bolmady, — deıdi Syrym Jaımaǵambetov.
Atalǵan departamenttiń memlekettik órt baqylaý basqarmasynyń bastyǵy, azamattyq qorǵaý podpolkovnıgi Baǵdat Abdýllınniń málimetine qaraǵanda, memlekettik órt baqylaý krıterııine sáıkes oblys aýmaǵynda 144 janar-jaǵarmaı, 41 gaz quıý stansasy esepke alynǵan.
— Azamattyq qorǵaý organdary qoldanystaǵy zańnamaǵa sáıkes 2015 jyldan beri qurylys salasynda baqylaý fýnktsııalaryn júzege asyrmaıdy. Jobalaý-smetalyq qujattamany kelisýge, jer ýchaskelerin qurylysqa bólý, salynyp jatqan obektilerdiń órtke qarsy jaı-kúıin tekserý jáne qurylysy aıaqtalǵan obektilerdi qabyldaý jónindegi komıssııalarǵa qatyspaıdy. Sáýlet, qala qurylysy jáne qurylys qyzmeti týraly zańǵa sáıkes obektiler qurylysynyń sapasyn baqylaý, sondaı-aq osy obektilerde sáýlet-qala qurylysy tártibin, jobalyq qujattamanyń sapasyn qadaǵalaýdy jergilikti atqarýshy organdar júzege asyrady, — deıdi Baǵdat Abdýllın.
Onyń deregine qaraǵanda, byltyr órt qaýipsizdigine tekserý júrgizý josparyna 47 janar-jaǵarmaı stansasy engizilgen.
— Baqylaý men qadaǵalaý sýbektisine barý arqyly 24 janar-jaǵarmaı stansasyna profılaktıkalyq tekserý júrgizildi. Al 23 janarmaı stansasyna órt qaýipsizdigi salasyndaǵy sáıkestigi týraly aýdıt júrgizilip, qorytyndy berildi. Tekserý júrgizý kezinde Tótenshe jaǵdaılar mınıstriniń 2022 jylǵy 21 aqpandaǵy qaǵıdasy talaptaryn saqtamaýǵa baılanysty birneshe kemshilik anyqtaldy, — deıdi Baǵdat Abdýllın.
Departament ókiliniń pikirinshe, birinshiden, bastapqy órt sóndirý quraldary jetkiliksiz bolǵan.
Ekinshiden, stansalar aýmaǵy janǵysh qoqystan, qurǵaq shópten, tógilgen munaı ónimderinen tazartylmaǵan.
Úshinshiden, jarylys-órt jáne órt qaýiptiligi boıynsha úı-jaılardyń sanattarymen jarylys nemese órt qaýpi bar aımaqtar klasy bolmaǵan.
Tórtinshiden, órt qaýipsizdigi belgileri talaptarǵa saı emes.
Besinshiden, avtomatty órt sıgnalyn berý qondyrǵylaryna tehnıkalyq kútim jumysy júrgizilmegen.
— Bıyl da janar-jaǵarmaı stansalaryna profılaktıkalyq tekserý júrgizý jospary jasaldy. Soǵan sáıkes 47 janar-jaǵarmaı stansasyna tekserý júrgizý josparlanyp otyr, — dedi Baǵdat Abdýllın.
Eske sala ketelik budan buryn Qulsaryda gaz-aýa qospasy jarylyp, 2 adam qaza tapqan edi.
Keıin Qulsarydaǵy jarylys janar-jaǵarmaı beketindegi rezervýarǵa gaz quıý kezinde bolǵany anyqtaldy.
Al keshe Qulsaryda órtengen janar-jaǵarmaı stansasy jobalaý qujatynsyz jumys istegeni áshkere boldy.