Atyraý oblysyndaǵy Taldykól aýylynyń turǵyndaryn evakýatsııalaý bastaldy

ATYRAÝ. KAZINFORM – Atyraý oblysyndaǵy Taldykól aýylynyń turǵyndaryn evakýatsııalaý bastaddy. Mundaı sheshim tasqyn sýdyń aýylǵa kiretin joldy basý qaýpine baılanysty qabyldanǵan. 

Mahambet aýdanynyń ákimi Qaırat Nurlybaevtyń aıtýynsha, tasqyn sý Taldykól aýylyna kiretin joldyń eki bóligine jaıylǵan.

«Osyǵan baılanysty turǵyndardy aldyn ala qaýipsiz aýmaqqa evakýatsııalaý bastaldy. Birinshi kezekte júkti áıelder, balalar men zeınet jasyndaǵy qarııalar kóshiriledi. Al, aýyr naýqastar oblystyq densaýlyq saqtaý basqarmasy ázirlegen algorıtm boıynsha evakýatsııalanady. Turǵyndar úshin Atyraý qalasyndaǵy APEC joǵary kolledjinde jáne «Dana» qonaq úıinde evakýatsııalyq pýnktter daıyndaldy», - dedi Qaırat Nurlybaev. 

Onyń aıtýyna qaraǵanda, Taldykól aýylynda 1,5 myńǵa jýyq turǵyn turady. Al, aýylǵa kiretin joldyń uzyndyǵy 7 shaqyrymdy quraıdy.

Eske sala ketelik, buǵan deıin Atyraý oblysyndaǵy Taldykól aýylyn tasqyn sý basý qaýpi joǵary ekenin jazǵan bolatynbyz.