Atyraý oblysyndaǵy Taldykól aýylynyń turǵyndary tolyq evakýatsııalanady
ATYRAÝ. KAZINFORM – Atyraý oblysynyń Mahambet aýdanyndaǵy Taldykól aýylynyń turǵyndary tolyq evakatsııalanady.
Mahambet aýdany ákiminiń orynbasary Arman Ádilǵalıevtyń málimetine súıensek, 9 aýyldyq okrýgtegi 21 aýylda 30 900 adam turady. Al, Jaıyq ózeniniń jaǵalaýynda 17 eldi meken ornalasqan.
«Beıbarys aýyldyq okrýgine qaraıtyn Taldykól eldi mekenindegi turǵyndar sany – 1 200-ge jýyq. Aýylda 223 úı, 5 kásipkerlik nysany bar. Biz birneshe kún buryn aýyl turǵyndary, onyń ishinde júkti analardy, balalar men múmkindigi shekteýli jandardy, egde jastaǵy qarııalardy Atyraý qalasyna kóshirgen edik. Endi aýylǵa kiretin joldy sý shaıýyna baılanysty aýyldaǵy barlyq turǵyndy qaýipsiz aımaqtarǵa kóshirýge májbúr bolyp otyrmyz. Sol sebepten, evakýatsııalaý jumysy bastaldy. Keshe túnnen beri jergilikti turǵyndar Atyraý qalasyndaǵy turǵyn úıine ketip jatyr. Qazir 100-den astam adam jolǵa shyqty», - dedi Arman Ádilǵalıev.
Onyń aıtýynsha, evakýatsııalanǵan turǵyndar H.Dosmuhamedov atyndaǵy Atyraý memlekettik ýnıversıtetiniń jataqhanasyna ornalasyp jatyr.
«Ýnıversıtet jataqhanasynda barlyq jaǵdaı jasalǵan. Turǵyndar úshin tósek-oryn jabdyǵy daıyndalǵan. Úsh mezgil tamaq beriledi. Bizge eń bastysy, turǵyndardyń qaýipsizdigi, amandyǵy qajet», - dedi Arman Ádilǵalıev.
Mańǵystaý oblystyq tótenshe jaǵdaılar departamentiniń aǵa ınjeneri, azamattyq qorǵaý aǵa leıtenanty Ýálıhan Jumabekovtiń aıtýyna qaraǵanda, Taldykól aýylynyń turǵyndaryn evakýatsııalaýǵa 24 qyzmetker, 6 qaıyq, 6 tehnıka tartylǵan.
«Aýyl turǵyndary mekteptiń janyna jınalyp jatyr. Osy kezge deıin 70 turǵyndy evakýatsııaladyq», - deıdi Ýálıhan Jumabekov.
Eske sala ketelik, keshe Atyraý-Oral trassasynan Taldykól aýylyna baratyn joldy tasqyn sý basqanyn jazǵan bolatynbyz.
Al, búgin Taldykól aýylynyń turǵyndaryn májbúrli evakatsııalaý bastaldy.
