Atyraý oblysyndaǵy Taldykól aýylyn tasqyn sý basý qaýpi joǵary

ATYRAÝ. KAZINFORM – Atyraý oblysyndaǵy Taldykól aýylyna qaýip tónip tur. Atalǵan aımaqty sý basýy múmkin ekeni habarlandy. 

Taldykól – Mahambet aýdanynda Jaıyq ózeni jaǵalaýyndaǵy eldi mekenniń biri. Bul eldi meken Beıbarys aýyldyq okrýginiń aýmaǵynda ornalasqan. Okrýg ákimi Seıilbek Zulhashevtyń aıtýynsha, Jaıyq ózeni deńgeıiniń kóterilýine baılanysty Taldykól aýylyn sý basý qaýpi bar.

«Osy kezge deıin aýyl mańynda 3 shaqyrymdyq qorǵanys bógeti salyndy. Qazir bógettiń 800 metr bekinisi jańartylyp jatyr. Jaǵalaýdy nyǵaıtý jumystaryna 28 áskerı qyzmetshi men Tótenshe jaǵdaılar mınıstrliginiń 15 qyzmetkeri tartyldy. Arnaıy 25 tehnıka bólindi. Jergilikti turǵyndar men sarbazdar bógetke 28 myń qap tósedi. Taldykól orta mektebinde 300 oryndyq evakýatsııalyq pýnkt daıyndaldy», - dedi Seıilbek Zulhashev. 

Onyń aıtýyna qaraǵanda, fermerler men sharýa qojalyqtarynyń ıelerine sý basý qaýpi týraly eskertýler berilgen. Qaýipsiz aýmaqqa 200 qoı-eshki, 300 sıyr aıdalǵan. 

Eske sala ketelik, budan buryn Ortaǵasyrlyq Saraıshyq qalashyǵyn sý tasqynynan qorǵaý kúsheıtilgen rejımde júrgizilip jatqanyn habarlaǵan bolatynbyz. Sondaı-aq Atyraý-Oral trassasynan Inderge baratyn joldy sý basý qaýpi qaıta tóngenin jazǵan edik.