Atyraý oblysyndaǵy taǵy bir kópir oıylyp, júk kólikteriniń ótýine tyıym salyndy

ATYRAÝ. KAZINFORM – Atyraý oblysynyń Mahambet aýdanynda Jaıyq ózeniniń ústinen salynǵan kópirde aqaý anyqtaldy. Sol sebepten, júk kólikteriniń kópirden ótýine tyıym salyndy.

Bul derekti Atyraý oblysy ákiminiń baspasóz hatshysy Rýslan Jumaǵazıev rastady. 

«Mahambet aýdanyndaǵy oblystyq mańyzy bar kópirde jaryq paıda boldy. Soǵan baılanysty júk kólikteriniń júrýine shekteý qoıyldy. Qazir atalǵan kópirdiń jaı-kúıine tehnıkalyq zerdeleý júrgizý úshin ótinim berildi», -dep habarlady Rýslan Jumaǵazıev.

Atalǵan kópirdiń qurylysy 2014 jyly bastalyp, 2017 jyly paıdalanýǵa berilgen. Kópirdiń uzyndyǵy – 8,5 shaqyrym, eni – 13 metr. Onyń qurylysyna respýblıkalyq jáne oblystyq bıýdjetten 9,4 mlrd teńge bólingen. Kezinde bul jobanyń bas merdigerligine «Atyraýınjsrtoı» JShS tańdalǵan. 

Bul kópirdiń júk kóterý qýaty 180 tonnaǵa eseptelgen. Onyń uzyndyǵy – 860, eni – 13 metr. Kópirge kóteriletin joldyń jalpy uzyndyǵy – 8,5 shaqyrym. Kópirdiń Jaıyq ózeniniń oń jaǵalaýyndaǵy tarmaǵy Mahambet aýylynyń tusynda Atyraý – Oral respýblıkalyq trassasyna qosylady.

Al, sol jaǵalaýdaǵy bóligi Ortaqshyl aýylynyń mańynda Atyraý – Inder oblystyq mańyzdaǵy jolǵa jetkizedi.

Mahambet aýdany ákimdiginiń málimetinshe, kópirdiń ortańǵy bóligine zaqym kelgen. Osyǵan baılanysty kópirde aýyr júk kólikteriniń júrýine tyıym salynǵan. Al, jeńil avtokólikterge saǵatyna 20 shaqyrymnan aspaıtyn jyldamdyqpen júrýge ruqsat etilip otyr. 

Sondaı-aq, atalǵan kópirge arnaıy jol belgileri qoıý josparlanǵan. 

Eske sala ketelik, buǵan deıin Jaıyq ózeniniń ústindegi kópir oıylyp qalǵanyn jazǵan edik.
Keıin bul kópirdiń oıyǵy tún ishinde jóndeldi.