Atyraý oblysyndaǵy Saraıshyq qalashyǵyn tasqynnan qorǵaý jumystary bastaldy
ATYRAÝ. KAZINFORM – Vıtse-premer Qanat Bozymbaev Inder aýdany Inderbor, Jasýat, sondaı-aq Atyraý oblysy Mahambet aýdanyna qarasty Mahambet, Saraıshyq, Taldykól aýyldarynda jaǵalaýdy nyǵaıtý jumystaryn tekserdi.
Óńirde sý tasqyny qaýpi saqtalýda. Oral-Inderbor jáne Oral-Mahambet gıdropostynda sý deńgeıi qaýipti belgiden asqan. Jaıyq ózeniniń deńgeıi áli de arta túsedi dep boljanyp otyr.
Barlyq qaýipti ýchaskede táýlik boıy kezekshilik uıymdastyryldy. Tabıǵı apatpen kúreske jergilikti turǵyndar, eriktiler jáne túrli kásiporyn qyzmetkerleri belsendi qatysady.
Inder aýdanynda jer bógetteriniń jalpy uzyndyǵy – 30 shaqyrym. Qorǵanys bógeti Jarsýat, Inderbor, Qurylys, Kóktoǵaı, Órlik, Esbol jáne Eltaı eldi mekenderinde salynǵan. Jumystarǵa 40-tan astam arnaıy tehnıka, 300-ge jýyq áskerı qyzmetshi jáne 100-ge jýyq TJ qyzmetkeri, onyń ishinde Qyzylorda oblysy TJD qyzmetkerleri jumyldyryldy.
Mahambet aýdanynda Jaıyq ózeniniń boıynda 17 eldi meken ornalasqan. Olardy qorǵaý úshin 80 km jaǵalaýdy nyǵaıtatyn bógetter salyndy. Aýdandaǵy bógetterdiń uzyndyǵy – 105,8 km. Sý tasqynyna qarsy is-sharalar jalǵasyp jatyr. 130 birlik arnaıy tehnıka, 650 áskerı qyzmetshi, 200-den astam TJ qyzmetkeri, 300-ge jýyq eriktiler men jergilikti turǵyndar tartyldy.
Óz kezeginde Vıtse-premer Qanat Bozymbaev Mahambet aýdanynyń ákimine ejelgi Saraıshyq qalashyǵynyń boıyndaǵy Jaıyq ózeniniń boıyndaǵy bógetti qosymsha kóterýdi tapsyrdy.
«Bul jerge ondaǵan tehnıka men Qorǵanys mınıstrliginiń jeke quramynyń júzdegen adamy tartylady. Bizdiń tarıhı muramyzdy qorǵaýǵa jáne saqtaýǵa jaýapkershilikpen qaraý qajet», - dedi Qanat Bozymbaev.
