Atyraý oblysyndaǵy Oıyl jáne Jem ózenderinde sý tasý qaýpi bar

ATYRAÝ. KAZINFORM – Atyraý oblysynda Jem men Qıǵash ózenderinde sý tasqyny qaýpi joǵary ekeni anyqtalyp otyr. Osyǵan oraı atalǵan sý aıdyndarynyń mańynda ornalasqan eldi mekenderdi qorǵaý úshin qajetti sharalar qabyldanady.

Atyraý oblysynyń ákimi Serik Shápkenovtiń aıtýynsha, dál qazir Jaıyq ózeninen qaýip tónip turǵan joq.

– Qazir Reseı Federatsııasynyń Orynbor oblysyndaǵy áriptestermen baılanys jasap otyrmyz. Jaıyq ózeninen asa qaýip tónip turǵan joq. Soǵan qaramastan ózen jaǵalaýynda bóget soǵylyp, bekitildi. Jem men Oıyl ózeninde sý tasý qaýpi bar. Jem ózeniniń boıyna bóget soǵylyp, saǵasy tazalandy. Sý tasqynyna qarsy áreket etetin negizgi kúshtik qurylym daıyn, - deıdi Serik Shápkenov.

Ákimniń pikirinshe, óńirdegi ár aýdanǵa jaýapty adam bekitilip, ýchaskelerge negizgi kúshtik qurylymdardy bólinedi. Kórshiles Aqtóbe jáne Reseıdegi Orynbor oblystaryndaǵy tıisti qurylymdarmen udaıy baılanys jasalyp, sý tasqynynyń qaýpi jónindegi derekter kún saıyn jańartylady.

– Oblys aýmaǵynda tasqyn qaýpi bar eldi mekenderdiń tizbesi qaıta qaralyp, naqtylandy. Baqylaýǵa alynǵan 51 eldi mekenniń 14-de tasqyn qaýpi azaıdy. Alaıda 37 eldi mekende áli de qaýip bar. Qyzylqoǵa aýdanyndaǵy 9 aýyldyq okrýg pen 5 eldi mekeninde jalpy uzyndyǵy 41,2 shaqyrym bóget salyndy. Jylyoı aýdanynda sý arnalarynyń 95,3 shaqyrym túbi tereńdetildi. Onyń ishinde 47,2 shaqyrymy Qursaı kanalynda, al 48,1 shaqyrymy Jem ózeninde tazalandy. Jaǵalaýǵa 65,3 shaqyrym bóget soǵyldy, - deıdi Serik Shápkenov.

Sý tasqyny kezindegi zalaldy joıý úshin 1 511 adam, 244 tehnıka, 187 motopompa, 20 júzý quraly, 3 tikushaq ázir tur. Sondaı-aq 48,5 tonna janar-jaǵarmaı, 235 tonna ınertti materıal, 866 myńnan astam qapshyq, 69 dana shatyr, 5 myńnan astam tósek jabdyǵy daıyndalǵan. Turǵyndardyń qaýipsizdigi úshin 200 evakýatsııalyq pýnkt ázirlendi.

Eske sala ketelik, buǵan deıin Atyraý oblysynda byltyrǵydaı sý tasqyny qaıtalanýy múmkin ekenin jazǵan edik.