Atyraý oblysyndaǵy Muqyr aýylynda burshaq jaýyp, kóshelerdi sý basty
ATYRAÝ. KAZINFORM – Atyraý oblysyndaǵy Muqyr aýylynda burshaq jaýdy. Sońynan jańbyr sirkirep, nóserge ulasty.
Muqyr – Qyzylqoǵa aýdanyndaǵy iri eldi mekenniń biri. Aýdan ortalyǵy – Mııaly aýylynan ońtústik-shyǵysqa qaraı shamamen 105 shaqyrym qashyqtyqta ornalasqan.
Bul aýyldyń mańynan Aqtóbe-Atyraý-Reseı Federatsııasynyń shekarasy baǵytyndaǵy poıyz qatynaıdy. Eldi mekenniń ústimen temirjol ótedi.
«Búgin tús mezgilinde aýylda aldymen burshaq jaýdy. Burshaqtyń sońynan jańbyr jaýyp, nóserge ulasty», -deıdi Muqyr aýyldyq okrýginiń ákimi Azamat Jaqsıev.
Okrýg ákiminiń aıtýynsha, jańbyr jarty saǵatqa jýyq jaýǵan. Tabıǵattyń tosyn qubylysynan eshkim zardap shekpegen. Turǵyn úıler men áleýmettik nysandar búlinbegen.
Qazir bul aýylda 2021 jylǵy sanaq boıynsha 3335 adam turady. Aýyl oqýshylary eki mektepte bilim alady. Mekteptiń biri 1941 jyldan beri jumys isteıdi. Keıin 1969 jyly 536 oryndyq jańa ǵımaratqa kóshirilgen. Al, ekinshisi – 424 oqýshyǵa arnalǵan bilim ordasy 2021 jyly paıdalanýǵa berilgen.
Sondaı-aq, «Altyn kilt» balabaqshasy bar.
Eske sala ketelik, buǵan deıin Atyraý oblysyndaǵy osy aýylda ıtti órtegen jigit qamaýǵa alynǵanyn jazǵan edik.
