Atyraý oblysyndaǵy Muqanǵalıevter otbasynyń ólimi: iske qatysty tyń málimet aıtyldy
ASTANA. KAZINFORM — Qazir qylmystyq isti tergeý birneshe bap boıynsha jalǵasyp jatyr. Bul jóninde QR Іshki ister mınıstriniń orynbasary Sanjar Ádilov málimdedi.
— Atyraýda Іshki ister mınıstrliginiń jedel-tergeý toby jumys istep jatyr. Bul qylmystyq is materıaldary baqylaýymyzda. Tergeý amaldarynyń kólemi óte aýqymdy. Qylmystyq is tek kisi óltirý boıynsha ǵana emes, sonymen qatar alaıaqtyq, urlyq faktileri boıynsha da qozǵalǵan. Kúdiktilerge birneshe bap boıynsha aıyp taǵylyp otyr, — dedi ol Májilis kýlýarynda jýrnalısterdiń suraǵyna jaýap bere otyryp.
Al kúdikti Aqbaıan Muqanǵalıeva psıhıatrııalyq aýrýhanaǵa jatqyzylǵan.
— Statsıonarlyq keshendi sot psıhologııalyq-psıhıatrııalyq saraptama júrgizilip jatyr. Ony taǵaıyndaýǵa negiz de bar. Kúdiktiniń ózin ustaýy jáne alǵashqy bergen jaýaptaryna baılanysty osyndaı sheshim qabyldandy. Іste jańa kúdiktiler joq. Kúdiktiler — er adam jáne onyń burynǵy jubaıy, — dedi Ádilov.
Eske salaıyq, Jangeldın aýylynda turatyn otbasy 2025 jyldyń sońyna belgisiz jaǵdaıda joǵalyp ketken.
6 qańtarda Atyraý oblysy aýmaǵynan joǵalǵan otbasynyń eki múshesiniń — otaǵasy Maqsot Qarabalın men onyń jubaıy Násip Óteshqalıevanyń denesi saraıdan tabyldy.
Keıin olardyń denelerinde pyshaq izderi bary belgili boldy.
9 qańtarda Atyraý oblysynda otbasy múshelerin óltirdi degen kúdikke ilingen marqumdardyń kúıeý balasy Sultan Sarsemalıev ekeni resmı túrde anyqtaldy.
Sondaı-aq joǵalǵan otbasy týraly tyń derekterdi áleýmettik jeli arqyly taratqan hakerge halyqaralyq izdeý jarııalandy.
Aqpan aıynyń basynda kúdiktiń 5 balasy memleket qamqorlyǵyna alyndy.
Qandy qylmysqa qatysy bolýy múmkin degen kúdikke sol úıdiń qyzy da ilindi.
Keıin eki kúdiktiniń shetelde qalaı ustalǵany jóninde vıdeo jarııalandy.
Erli-zaıyptyny óltirdi degen kúdikke ilingender Indonezııadan Atyraýǵa jetkizilgenin de habarlaǵanbyz.
