Atyraý oblysyndaǵy «Morskoe» ken ornynda munaı aralasqan suıyqtyq tógilgen

ATYRAÝ. KAZINFORM – Atyraý oblysyndaǵy «Morskoe» ken ornynda munaı aralasqan suıyqtyq tógilgeni anyqtaldy. «Qojan» AQ apattyq jaǵdaıdy týraly mezgilinde habarlamaǵan. 

Atyraý oblystyq ekologııa departamentiniń baspasóz qyzmetinen málim etkendeı, oqıǵa 2024 jyldyń 25 jeltoqsanynda bolǵan. Osyǵan oraı jospardan tys tekserý júrgizilgen. 

– Tekserý kezinde «Qojan» AQ-nyń «Morskoe» ken ornyndaǵy №56 uńǵyda apattyq jaǵdaı bolǵany rastaldy. Sonyń saldarynan lastaýshy zattardyń shyǵaryndylary ruqsatsyz shyǵarylyp, jerge munaı aralasqan suıyqtyq tógilgen. Topyraq lastanǵany, bul derek boıynsha zańmen kózdelgen merzimde qorshaǵan ortany qorǵaý salasyndaǵy ýákiletti organǵa habarlanbaǵany anyqtaldy. «Qojan» AQ basshylary apattyq shyǵaryndylar shyǵarýdy habarlamaǵanyna zań buzýshylyq ekenimen kelisip, moıyndady. Kompanııaǵa qysqartylǵan túrde 393 myń 200 teńge aıyppul salyndy, - dep habarlady departamenttiń baspasóz qyzmeti.

Sondaı-aq apattyq shyǵaryndylardy ruqsatsyz shyǵarý deregi boıynsha zańdy tulǵaǵa qatysty ákimshilik quqyq buzýshylyq týraly hattama toltyryldy. Qazir ákimshilik is qaralyp jatyr. 

– Jerge munaı aralasqan suıyqtyq tógilip, topyraqtyń lastaný deregine qatysty QR Qylmystyq kodeksiniń normalaryna sáıkes protsessýaldy sheshim qabyldanady. Osyǵan baılanysty Atyraý oblystyq polıtsııa departamentine tıisti tıisti qujattar joldandy, - dep málim etti departamenttiń baspasóz qyzmetinen.

Eske sala ketelik, budan buryn Atyraý munaı óńdeý zaýytynyń jelisinen janarmaı aqqanyn jazǵan bolatynbyz.