Atyraý oblysyndaǵy Maqat aýdanynyń ákimi qyzmetinen ketti
ATYRAÝ. KAZINFORM – Atyraý oblysyndaǵy Maqat aýdanynyń ákimi Rınat Ibragımov qyzmetinen ketti. Búgin Atyraý oblysy ákiminiń baspasóz qyzmeti bul derekti rastady.
Rınat Ibragımov Maqat aýdanynyń ákimi qyzmetinen óz erkimen ketken. Ol bul laýazymyna 2022 jylǵy naýryzda taǵaıyndalǵan. Bul taǵaıyndaýǵa deıin Atyraý oblystyq dene shynyqtyrý jáne sport basqarmasynyń basshysy bolǵan.
Al, jaqynda burynǵy áıeli Rınat Ibragımovten zábir kórgenin aıtty. Onyń vıdeosy áleýmettik jelide tarady.
Atyraý oblystyq polıtsııa departamentiniń baspasóz qyzmeti aýdan ákimine qatysty qylmystyq is QR Qylmystyq kodeksiniń 107-babynyń 2-bóligimen tergelgenin habarlady. Qylmystyq is aqpan aıynda sotqa jiberilgen.
Keıin Atyraý oblysy ákiminiń baspasóz qyzmetinen málim etkendeı, aýdan ákiminiń burynǵy jubaıy ákimdikke júginbegen bolyp shyqty.
«Azamatsha A.Úmbetqalıeva Atyraý oblysynyń ákimdigine júginbegenin habarlaımyz. Týyndaǵan mán-jaılarǵa baılanysty qyzmettik tekserý taǵaıyndaldy», - dep habarlaǵan edi oblys ákiminiń baspasóz qyzmeti.
Atyraý oblystyq sotynyń baspasóz qyzmeti aýdan ákimine qatysty qylmystyq istiń qaralyp jatqanyn rastady.
«Qylmystyq is Atyraý qalasynyń №2 sotynda qaralyp jatyr. Kelesi sot otyrysy 29 mamyrda saǵat 10:00-de ótedi», - dep habarlaǵan bolatyn oblystyq sottyń baspasóz qyzmeti.
Osyǵan baılanysty Rınat Ibragımovtiń ózi túsinik berip, pikir bildirdi. Onyń aıtýynsha, burynǵy áıelimen ortaq balalary ózimen birge turady.
«Burynǵy jubaıymnyń meniń atyma taqqan negizsiz aıyptaýlary men jalǵan aqparaty BAQ-ta keńinen tarap ketti. Burynǵy jubaıym ártúrli áleýmettik jelide taraǵan sońǵy oqıǵalarǵa baılanysty meniń laýazymdy tulǵa ekenimdi bile tura, osyndaı málimdemeler jasap jatqan sııaqty. Bizdiń ortaq balalarymyz – 2 qyzym menimen birge turady. Olar mahabbat pen súıispenshilikte ómir súrýde. Mundaı sheshim eki qyzymnyń qalaýy boıynsha qabyldandy. Budan basqa bul týraly sottyń zańdy sheshimi de shyqty. Shabýyl jasady degen aıyptaýlarǵa kelsek, qazir sot protsesi júrip jatqandyqtan, BAQ ókilderinen asyǵys qorytyndy jasamaýdy suraımyn», - dedi Rınat Ibragımov.
