Atyraý oblysyndaǵy Kózdiqara aýylynyń turǵyndaryn evakýatsııalaý bastaldy
ATYRAÝ. KAZINFORM – Atyraý oblysynda Oıyl ózeniniń arnasynan asqan tasqyn sýdyń qaýpi áli seıilmeı tur. Búgin Qyzylqoǵa aýdanyndaǵy Kózdiqara aýylynan 30-dan astam turǵyn evakýatsııalandy.
Oblystyq Polıtsııa departamentiniń baspasóz qyzmetinen málim etkendeı, sý polıtsııasynyń qyzmetkerleri turǵyndardy evakýatsııalaýǵa kómekke keldi.
«Tasqyn sý Qyzylqoǵa aýdanynyń ortalyǵy – Mııaly aýylynan shyǵatyn aınalma joldy shaıyp ketti. Qazir jol qozǵalysy toqtady. Sý polıtsııasynyń qyzmetkerleri aýdanǵa kelgen gýmanıtarlyq kómekti motorly qaıyqpen jetkizýge atsalysýda. Keshe, 1 sáýirden beri tasqyn sý basqan Taısoıǵan aýylynan 100-den astam turǵyn motorly qaıyqpen evakýatsııalandy. Búgin, 2 sáýirde tańǵy saǵat 7-den beri Kózdiqara eldimekeninen 30-ǵa jýyq turǵyndy evakýatsııalaý bastaldy», - dep habarlady departamenttiń baspasóz qyzmeti.
Eske sala ketelik, budan buryn Atyraý oblysyndaǵy bir aýdanda tótenshe jaǵdaı jarııalanǵanyn habarlaǵan edik.
Keıin Oıyl ózenindegi sý tasqynyna baılanysty Mııaly aýylynan 559 turǵyn evakýatsııalandy.
Sondaı-aq, Mııaly aýylyna tirelgen sýdyń deńgeıi 1 metr 20 sm boldy.
Oıyl ózeniniń mańynan 7 sharýa qojalyǵy qaýipsiz aýmaqqa kóshirildi.
Mııaly aýylyn tasqyn sýdan qorǵaý jalǵasyp jatqanyn jazǵan edik.
Oıyldyń arnasynan asqan sý Mııaly aýyly mańyndaǵy kópirdi buzyp ketti.
