Atyraý oblysyndaǵy qosalqy stantsııa qurylysy nege aıaqtalmaı tur
ATYRAÝ. KAZINFORM – Qulsary qalasyndaǵy «Atyraý» yqshamaýdanynda salynyp bastalǵan qosalqy stantsııa qurylysy 2021 jyldan beri aıaqtalmaı keledi. Bul joba yqsham aýdan aýmaǵynda jańa nysandar salynyp, tutyný kólemi artqan jaǵdaıda elektrmen turaqty qamtýǵa múmkindik beredi.
Atalǵan joba boıynsha qurylys 2021 jylǵy 4 mamyrda bastalyp, sol jyldyń 4 jeltoqsanynda aıaqtalýy tıis bolǵan. Alaıda jobalyq-smetalyq qujattamada qarastyrylmaǵan qosymsha jumystar men jabdyqtar anyqtalyp, qurylys-montaj jumysy belgilengen merzimde tolyq aıaqtalmaǵan.
Mamandardyń málimetinshe, bastapqy smetada birqatar mańyzdy elektr tehnıkalyq jabdyq eskerilmegen. Atap aıtqanda, ajyratqyshtar, aıyrǵysh bloktar, kerneý transformatorlary, kerneýden qorǵaý júıeleri men qatty shınalar jıyntyǵy jobada tolyq qarastyrylmaǵan. Sonymen qatar 110 kV áýe elektr jelisiniń ýaqytsha aınalma ýchaskesin uıymdastyrý jáne qosymsha materıaldarǵa ketetin shyǵyndar da esepke alynbaǵan.
Osyǵan baılanysty jobaǵa túzetý engizý qajettiligi týyndaǵan. Qazirgi tańda jobalyq-smetalyq qujattama qaıta qaralyp, tıisti tolyqtyrýlar engizilip jatyr.
Joba aıasynda jalpy uzyndyǵy 17,6 shaqyrym áýe elektr jelisin júrgizý josparlanǵan.
- Qazirgi tańda joba aıasynda qurylys-montaj jumystarynyń 88%-y aıaqtaldy. Atap aıtqanda, tirekterdi ornatý, jelilerdiń negizgi bóligin tartý, sondaı-aq birqatar elektr tehnıkalyq jabdyqtardy montajdaý jumystary oryndalǵan. Qalǵan jumystar jobany tolyq aıaqtaý úshin jabdyqtardy jetkizý, montajdaý jáne iske qosý-baptaý jumystaryn qamtıdy, - dep málimdedi aýdandyq qurylys bólimi.
Ákimdiktiń endigi jospary jobaǵa engiziletin túzetýler boıynsha jobalyq-smetalyq qujattamany tolyqtaı aıaqtaý jáne tıisti saraptamadan ótkizý. Odan keıin qurylys-montaj jumystaryn qaıta jandandyryp, nysandy belgilengen talaptarǵa sáıkes tolyq aıaqtamaq.
Aıta keteıik, jobanyń bastapqy quny 2 mlrd 555 mln teńgeni quraǵan. Búgingi tańda onyń 2 mlrd 261 mln teńgesi ıgerilgen.
Jergilikti atqarýshy organnyń málimetinshe, merdiger uıym qurylys jumystaryn bekitilgen jobalyq qujattamaǵa sáıkes oryndaıdy. Qosymsha ózgerister tek tapsyrys berýshi men jobalaýshy uıymnyń kelisimimen engiziledi.
Mamandar bul joba tolyq aıaqtalǵan jaǵdaıda Qulsary qalasyndaǵy áleýmettik nysandardy turaqty ári sapaly elektrmen qamtýǵa múmkindik beretinin atap ótti.
Buǵan deıin ulttyq joba aıasynda óńirlerdegi 11 elektr stantsııasy jańǵyrtylatynyn jazǵan edik.
