Atyraý oblysyndaǵy Qyzylúı aýylynyń turǵyndary ishimdikten bas tartty

ATYRAÝ. KAZINFORM – Atyraý oblysyndaǵy Qyzylúı aýylynyń turǵyndary ishimdikten bas tartýǵa sheshim qabyldady. Bul aýylda sońǵy 5 jyldan beri qylmys tirkelmegen.

Qyzylúı – Isataı aýdanyndaǵy Tuşyqudyq aýyldyq okrýgine qaraıtyn shaǵyn eldi meken. Alaıda okrýgke emes, aýdan ortalyǵy – Aqqystaý aýylyna jaqyn ornalasqan. Bul aýylmen araqashyqtyq – 28 shaqyrym. 

Eldi mekende 2009 jyly 347 adam turǵan. Onyń ishinde 183 er, 164 áıel bolǵan eken. Alaıda 2021 jylǵy sanaqtyń qorytyndysymen turǵyndar sany azaıǵany baıqalǵan. Sol jylǵy sanaqtyń qorytyndysymen turǵyndardyń sany 244 (132er, 112 áıel) adamdy quraǵan.

Tuşyqudyq aýyldyq okrýginiń ákimi Aıbatyr Bekishulynyń aıtýynsha, atalǵan eldi mekenniń irgetasy 1913 jyly qalanǵan. Sol kezde alǵashqy ǵımarat qyzyl saz balshyq tastan salynǵan. Qyzyl úı ataýy soǵan baılanysty qoıylǵan. Keıin ujymshar men keńshardyń ferma ortalyǵy bolǵan.

– Qazir Qyzylúıde 265 adam, onyń ishinde 145 er, 120 áıel turady. Turǵyndar arasynda 38 zeınetker, mektepke deıingi jastaǵy 37 bala, 30 oqýshy bar. Eldi meken turǵyndary úshin 2018 jyly sý qubyry tartylyp, ár úı taza aýyz sýmen qamtyldy. Al byltyr tabıǵı gaz jelisi iske qosyldy, -deıdi Aıbatyr Bekishuly.

Eldi mekende tirkelgen 33 sharýa qojalyǵynda 1613 múıizdi iri qara, 2271 qoı, 492 eshki, 1240 jylqy, 592 túıe esepke alynǵan. Al turǵyndardyń jeke ıeliginde 448 sıyr, 404 qoı, 255 eshki, 226 jylqy, 264 túıe bar.

– Bolashaq – keleshek urpaqtyń qolynda. Al jas býynnyń teris ádetten, onyń ishinde alkogoldik ishimdikten aýlaq bolǵanyn qalaımyz. Osy maqsatty kózdegen Qyzylúı eldi mekeniniń turǵyndary ishimdiksiz aýyl bastamasyna qoldaý bildirdi. Bul bastamanyń astarynda tek turǵyndardyń qaýipsizdigin saqtaý ǵana emes, ulttyq qundylyqtar men mádenıetti jańǵyrtý, rýhanı tazalyqty úlgi etý máselesi bar. Aýyldaǵy bereke men birlik, tártip pen tynyshtyq – osy ustanymnyń jemisi. Qyzylúı turǵyndarynyń bastamasy ishimdiksiz, sanaly qoǵam qurý jolyndaǵy batyl ári mańyzdy qadam retinde ózge aýyldarǵa úlgi bolady, -deıdi Aıbatyr Bekishuly.

Okrýg ákiminiń aıtýyna qaraǵanda, Qyzylúı eldi mekenindegi sońǵy 5 jylda birde-bir qylmys tirkelmegen. Aýdandyq polıtsııa bólimine mas kúıde quqyq buzýshylar jetkizilmegen. Dúkende ishimdik satylmaıdy.

– Bul eldi mekende 1986 jyly bastaýysh mektep ashylǵan edi. Bala sanynyń kóbeıýine baılanysty 1990 jyly negizgi mektepke aınaldy. 2019 jyly 80 oryndyq eki qabatty mekteptiń jańa ǵımaraty paıdalanýǵa berildi. Qazir bilim ordasynda 30 oqýshy dáris alady, -dep málim etti Aıbatyr Bekishuly.

Sondaı-aq aýylda feldsherlik pýnkt, klýb men kitaphana jumys isteıdi.

Eske sala ketelik, budan buryn Atyraýdaǵy Qurylys aýylynyń turǵyndary 5 jyl buryn ishimdikten bas tartqanyn jazǵan bolatynbyz.