Atyraý oblysyndaǵy ken ornynda aýaǵa atqylaǵan gaz alaýy áli toqtaǵan joq
ATYRAÝ. KAZINFORM — Atyraý oblysyndaǵy Batys Prorva ken ornynda aýa gaz alaýy áli atqylap jatyr.

«Embimunaıgaz» AQ baspasóz qyzmetiniń málimetinshe, Batys Prorva ken orny Jylyoı aýdanynda ornalasqan. Atalǵan ken ornynan «Jylyoımunaıgaz» basqarmasy munaı men gaz óndiredi.
Keshe, 6 naýryzda ken ornyndaǵy № 437 uńǵymada perforatsııa júrgizilgen. Sodan keıin sorapty-kompressorlyq qubyrdy túsirý kezinde gaz atqylaǵan. Aýaǵa atqylaǵan gazdyń saldarynan sorapty-kompressorlyq qubyr isten shyqqan.
— Bul — konservatsııada turǵan ken orny. Ondaǵy gaz atqylaýy áli toqtaǵan joq, -dep málim etti kompanııanyń baspasóz qyzmeti.
Telegram arnasynyń biri gaz alaýynyń bıiktigi 20 metrge jetkenin habarlady. Alaıda «Embimunaıgaz» AQ-nyń baspasóz qyzmeti bul derekke baılanysty aqparat bergen joq.
Gaz alaýyn toqtatý úshin «Embimunaıgaz» AQ-da jedel shtaby qurylyp, shuǵyl sharalar qolǵa alynǵan. Ken ornynyń aýmaǵy qorshalǵan. Gaz alaýyn sóndirýge «Aq Beren», «Semser Órt sóndirýshi» mamandary tartylǵan. Sondaı-aq «SOP Atyraý» JShS-niń mobıldi kúzeti jumyldyrylǵan.
Eske sala ketelik, buǵan deıin Atyraý oblysyndaǵy Batys Prorva ken ornynda aýaǵa gaz atqylaǵanyn jazǵan edik.