Atyraý oblysyndaǵy kanaldan 441 keli ólgen balyq jınaldy
Atyraý oblysyndaǵy Tuzdy kóline quıatyn kanalda móńke balyǵy qyrylǵan. Keshe keshke deıin kanaldan 441 keli óli balyq jınalyp alyndy, dep habarlaıdy Kazinform.
Jaıyq-Kaspıı oblysaralyq basseındik balyq sharýashylyǵy ınspektsııasynyń málimetinshe, Balyq sharýashylyǵyn ǵylymı-óndiristik ortalyǵy, Atyraý oblysy boıynsha ekologııa departamenti, Jylyoı aýdanynyń prokýratýrasy jáne jergilikti atqarýshy organdardyń qyzmetkerlerinen jumysshy toby qurylǵan.
«Jumys toby oqıǵa ornyna baryp, kanalda móńke balyǵynyń qyrylǵany anyqtaldy. Jergilikti atqarýshy organdarmen birlesip ólgen balyqty jınaý, keıinnen joıý jumystary uıymdastyryldy. Keshe, 2 qańtarda jergilikti ýaqytpen saǵat 21:00–degi jaǵdaı boıynsha jınalǵan balyqtyń salmaǵy — 441 keli» dep habarlady ınspektsııanyń baspasóz qyzmeti.
Búgin, 3 qańtarda ólgen balyqty jınaý jumystary jalǵasady.
Balyq qyrylǵan jerden zerthanalyq zertteý úshin ólgen balyq pen sýdan synama alynǵan.
«Aldyn ala boljamǵa sáıkes balyqtyń qyrylýyna sýdaǵy otteginiń jetispeýshiligi sebep bolǵan. Óıtkeni, aýa temperatýrasy tómendep, kanalda muz qatqan» dep málim etti ınspektsııanyń baspasóz qyzmetinen.
Balyq qyrylǵan kanal Jylyoı aýdanynda ornalasqan.
Aýdan ortalyǵy — Qulsary qalasyn kóktemgi qarǵyn sý baspaýy úshin sýdyń artyq kólemi kanal arqyly Tuzdy kóline jiberiledi.
Arnanyń uzyndyǵy — 3 shaqyrym.
Buryn bul arnada balyqty qutqarý jumystary júrgizilmegen.
Eske sala ketelik, buǵan deıin Atyraý oblysynda balyq qyrylyp jatqanyn jazǵan edik.
