Atyraý oblysyndaǵy Qamyskól kóline shomylýǵa ýaqytsha tyıym salyndy

ATYRAÝ. KAZINFORM – Atyraý oblysynda ornalasqan Qamyskól kóline shomylý úshin túsýge bolmaıdy. Jylyoı aýdanynyń ákimdigi turǵyndarǵa eskertý jasady. 

Qamyskól kóli – Jylyoı aýdanyndaǵy Qulsary qalasynyń batys bóligine taıaý ornalasqan sý aıdyny. Onyń aýmaǵy asa úlken emes, shamamen uzyndyǵy – 3,2, al eni 1,3 shaqyrymdy quraıdy. Atalǵan kól Jem ózeninen Baqashy jáne Qursaı kanaly arqyly kelgen sýmen tolyǵady.

– Qulsary qalasynyń mańyndaǵy Qamyskól kólinen alynǵan sý synamasynan sanıtarlyq-bakterıologııalyq, sanıtarlyq-hımııalyq kórsetkishterge jasalǵan taldaý qorytyndysymen oń nátıje anyqtaldy. Osyǵan baılanysty atalǵan kóldiń sýyna ýaqytsha túsýge tyıym salynady. Aýdan turǵyndary men qonaqtaryna densaýlyqtyń mańyzy úshin atalǵan sharany qatań saqtaýdy eskertemiz, - dep habarlady ákimdikten. 

Eske sala ketelik, buǵan deıin Atyraý oblysynyń sý aıdyndarynda 46 orynda shomylýǵa ruqsat beriletinin habarlaǵan edik.