Atyraý oblysyndaǵy Inderbor kentinde órtten eki bala mert boldy

ATYRAÝ. KAZINFORM – Atyraý oblysyndaǵy Inderbor kentinde turǵyn úıdiń páteri órtenip, eki bala mert boldy.

Atyraý oblystyq tótenshe jaǵdaılar departamenti qoǵammen baılanys tobynyń málimetine súıensek, órt týraly búgin, 25 sáýirde tańǵy saǵat 05:37-de habar túsken. 

«Órt 5 qabatty turǵyn úıdiń 2-qabatyndaǵy páterde tutanǵan. Shaqyrtý ornyna órt sóndirýshiler jetken kezde páterdiń tolyqtaı janǵany anyqtaldy. Páterdiń jatyn bólmesinen 2014 jáne 2017 jylǵy balalardyń óli denesi tabyldy. Balalardyń anasy –1995 jylǵy áıel men onyń azamattyq nekedegi kúıeýi es-tússiz kúıde tabyldy. Olar jedel járdem brıgadasynyń kóligimen aýdandyq ortalyq aýrýhananyń jansaqtaý bólimine jetkizildi», - dep habarlady departamenttiń qoǵammen baılanys toby. 

Qazir jalynnyń tutaný sebebin anyqtaý maqsatynda órt-zertteý zerthanasy jumys júrgizip jatyr. 

Órt saǵat 06:02-de oqshaýlanyp, saǵat 06:10-da tolyq sóndirildi. 

Eske sala ketelik, budan buryn Atyraý oblysynda júk kóligindegi 22 tonna maqta túgi qalmaı órtenip ketken edi.