Atyraý oblysyndaǵy Inder aýdanynda Jaıyq bir táýlikte 38 santımetrge kóterildi

ATYRAÝ. KAZINFORM – «Qazgıdromet» RMK Atyraý oblystyq fılılalynyń gıdrologııalyq monıtorıng deregine súıensek, Jaıyq ózeniniń deńgeıi kún saıyn kóterilip jatyr. 

Máselen, Inder aýdanynda keshe, 2 mamyrda tańerteńgi saǵat 08:00-de ózen arnasynyń sýy 750 santımetr bolǵan edi. Al, búgin, 3 mamyrda 788 santımetrge jetti. Osylaısha, bir táýlikte Jaıyq ózeni +38 santımetrge kóbeıgen.

Mahambet aýdanynda 2 mamyr kúni tańerteń Jaıyqtyń sýy 795 santımetr deńgeıinde bolatyn. Sol kúni keshki saǵat 20:00-de 8 metrden asyp ketti. Bir táýliktiń ishinde bul aýdandaǵy sýdyń kóterilý kórsetkishi +17 santımetrdi quraǵan. Búgin, 3 mamyrda sý deńgeıi 812 santımetrge jetti. 

Atyraý qalasynda da Jaıyq ózeniniń sýy kóterilip tur. Keshe tańǵy ýaqyttan beri sý aıdyny +12 santımetrge ulǵaıdy. Qazir munaıly shahardaǵy ózen arnasynyń deńgeıi 471 santımetrdi qurady. 

Eske sala ketelik, budan buryn Atyraý oblysynda sý tasqynyna daıyndyq qalaı júrgizilgenin jazǵan bolatynbyz. 

Keshe saǵat 20:00-de Mahambet aýdanynda Jaıyq ózeniniń deńgeıi 8 metrden asyp ketti.