Atyraý oblysyndaǵy «erekshe kóshe»: eki jaqta 28 jol belgisi tur
ATYRAÝ.KAZINFORM — Jylyoı aýdanynyń ortalyǵy Qulsaryda jaıaý júrginshilerge arnalǵan jol belgileriniń ornalasýyna qatysty turǵyndar narazylyq bildirdi.
Olardyń aıtýynsha, adam kóp júretin jerlerde belgi jetispeıdi, al qala shetindegi keı kóshelerde kerisinshe tym kóp ornatylǵan.
Qala turǵyndarynyń sózinshe, kólik aǵyny kóp, qaýip basym jerde jaıaý júrginshiler belgisi sırek ornalasqan. Al ákimdik qala shetindegi Jadyrasyn aýylyndaǵy kóshelerdiń birine ondaǵan metr saıyn arnaıy belgi qoıǵan. Naqtyraq aıtqanda, shetki aınalma jol esepteletin, uzyndyǵy 2,8 shaqyrym bolatyn kósheniń bir jaq betine 14 jaıaý júrginshilerge arnalǵan jol belgisi ornatylypty.
— Joldyń bir shetine 2024 jyly tasqyn kezinde bóget soǵyldy. Balalarǵa, úlken kisilerge kerek jerge qoıylmaı, osy aýmaqqa ornatqan. Bul kóshege ne úshin salynǵanyn túsinbeımiz, aýmaq typ-tynysh, júrip jatqan adamdy baıqamaımyz, — dep pikir bildirdi qala turǵyny.
Bul máselege qatysty aýdan ákimdigi pikir bildirdi. Resmı aqparatqa súıensek, jol belgileri bul kóshege aýdannyń keshendi damý dınamıkasyna sáıkes aldaǵy ýaqytta turǵyn úı qurylysy júrgizilip, halyqtyń qonystanýy josparlanǵan jerlerdi eskere otyryp, josparǵa seıkes aldyn ala ornatylǵan.
— Jol belgilerin ornatý kezinde qoldanystaǵy jalpy tehnıkalyq talaptar, onyń ishinde QR ST 1125-2002 standartynyń talaptary basshylyqqa alyndy jáne joba memlekettik saraptamanyń oń qorytyndysyn alǵan. Turǵyndar tarapynan atalǵan máseleniń jıi kóterilgenin eskerip Jylyoı aýdanynyń polıtsııa basqarmasynyń ákimshilik-tehnıkalyq qadaǵalaý ınspektorymen birlesip, qala ishindegi jaıaý júrginshilerge arnalǵan jol belgileri ornatylmaǵan ýchaskelerge zerdeleý jumystary júrgizilip, sáıkesinshe jol belgileriniń ornyn almastyrý jumysy atqarylyp jatyr, — dedi Jylyoı aýdany jolaýshylar kóligi jáne avtomobıl joldary bóliminiń basshysy Beket Bozjigitov.
Jaýapty bólim Jylyoı aýdanynyń polıtsııa basqarmasynan jol belgilerin ornatý, aýystyrý nemese tolyqtyrý jóninde nusqama kelip túsken jaǵdaıda qoldanystaǵy talaptarǵa sáıkes tıisti jumystar júrgiziletinin málimdedi.
Buǵan deıin Astanada 20 myńnan astam jaıaý júrginshi jol erejesin buzǵanyn jazǵan edik.
