Atyraý oblysyndaǵy «Dımash tóbe» tarıhı-mádenı kesheni qashan ashylady

ATYRAÝ. KAZINFORM – Atyraý oblysynda 2023 jylǵy qarashada «Dımash tóbe» tarıhı-mádenı kesheniniń qurylysy bastalǵan edi. 

«Dımash tóbe» atalatyn jer Inder aýdanynan Qyzylqoǵa aýdanyna qatynaıtyn joldyń boıynda ornalasqan. Aýdan ortalyǵy – Inderbor kentimen aralaǵy – 8 shaqyrym. 

Inder aýdandyq qurylys bóliminiń basshysy Daryn Іlııasovtyń aıtýynsha, tarıhı-mádenı keshende túrindegi arheologııalyq jádigerler, mıneral tastar jınaqtalady. 

– Tarıhı-mádenı keshenniń aýmaǵy 1 myń 750 sharshy metr. Qurylysty «SK Lıra» JShS júrgizip jatyr. Qazir qurylys jumystarynyń basym bóligi atqaryldy. Jumysqa 12 jumysshy men 4 arnaıy tehnıka tartyldy. Jobanyń avtorlyq qadaǵalaýyna «Spetsstroısoglasovanıe» JShS mindetine aldy. Al, «Caspian Alliance Kazakhstan» JShS tehnıkalyq baqylaý júrgizip otyr Keshenniń qurylysy shilde aıynda tolyq aıaqtalady, - deıdi Daryn Іlııasov. 

Onyń pikirinshe, keshenniń aýmaǵyna doǵa pishindes mańdaısha ornatylyp, «Dımash tóbe» ataýy jazylady. Sol jaǵyna tarıhı fotosýret, oń jaǵyna keshen týraly aqparattyq taqta ornatylady. 

– Keshenge qazba baılyqtar men rýdalar salynǵan tas jáshikter, 2 úlken kúmbezdi kompozıtsııa qoıylady. Bul keshen – Inder aýdanynyń tarıhı ereksheligin tanytatyn, týrısterdi tartýǵa yqpal etetin jańa nysan bolady. Joba aıaqtalǵan soń keshen óńirlik týrıstik kartaǵa engiziledi, - dedi Daryn Іlııasov.

Eske sala ketelik, buǵan deıin Atyraýda Dinmuhamed Qonaev aıaldaǵan jerde ashyq aspan astyndaǵy murajaı ashylatynyn jazǵan edik.