Atyraý oblysyndaǵy Baqsaı kanalynda balyq shabaǵyna qyrylý qaýpi tóndi
ATYRAÝ. KAZINFORM – Atyraý oblysyndaǵy Baqsaı kanalynda balyq shabaǵyna qyrylý qaýpi tóndi. Ázirge 180 myń shabaq qutqarylǵan.
Jaıyq-Kaspıı oblysaralyq basseındik balyq sharýashylyǵy ınspektsııasynyń málimetinshe, oqıǵa 13 qańtarda H.Erǵalıev aýylynyń tusynda anyqtalǵan.
– Keshe, 14 qańtarda ózara is-qımyl shemasyna sáıkes arnaıy top qurylyp, oqıǵa ornyna bardy. Top quramynda ınspektsııanyń, Ekologııa departamenti men Tabıǵı resýrstar jáne tabıǵatty paıdalanýdy retteý basqarmasynyń, veterınarııalyq qyzmet pen balyq sharýashylyǵy ǵylymı-óndiristik ortalyǵynyń qyzmetkerleri bar. Kanaldan 180 myńǵa jýyq shabaq qutqaryldy. Zerthanalyq taldaý júrgizý úshin sý men balyq shabaǵynan synama alyndy, - dep habarlady ınspektsııadan.
Inspektsııanyń málimetinshe, balyq shabaqtarynyń qyrylýynyń aldyn ala eki sebebi bar. Birinshisi – kanal sýynda otteginiń jetispeýshiligi, ekinshisi – muz qatýy.
– Belgilengen tártipke sáıkes ólgen shabaqtardy joıý jumysy qolǵa alyndy. Joıylǵan shabaqtardyń sany keıin habarlanady. Qazir kanaldaǵy ahýal baqylaýǵa alyndy, - dep málim etti ınspektsııadan.
Eske sala ketelik, buǵan deıin Atyraýda zańsyz balyq aýlaǵan brakonerler mototsıklin tastap qashyp ketkenin habarlaǵan edik.