Atyraý oblysyndaǵy aýdanda múmkindigi shekteýli jandarǵa qyzmet tek qaǵaz júzinde kórsetilip kelgen

ATYRAÝ. KAZINFORM – Zań talaptaryn óreskel buzý faktileri Atyraý oblysynyń Inder aýdanynan anyqtaldy.

Tekserý barysynda memlekettik qoldaýdyń kóp jaǵdaıda qaǵaz júzinde ǵana kórsetilgeni anyqtaldy.

Qadaǵalaý organynyń nazarynda kúndizgi bólimshesi bar jartylaı statsıonarlyq úlgidegi uıym turdy.

Alaıda zerdeleı kele, Áleýmettik kodeks talaptarynyń ashyqtan-ashyq elenbegeni belgili boldy.

Atap aıtqanda balalardy qoldaýǵa arnalǵan beıindi mekemede birde-bir tárbıelenýshi bolmaǵan. Atalǵan kezeńde múmkindigi shekteýli balalarǵa múldem qyzmet kórsetilmegen.

Jaýapty tulǵalar jumystaǵy «úzilisti» tıisti ǵımarattyń joqtyǵymen túsindirgen. Qaǵazbastylyqpen álek bolǵan sheneýnikter men oryn anyqtaýmen aınalysqan mekemelerdiń arasynda, eń aldymen, balalar zardap shekti — olar qajetti ońaltý men kútimsiz qaldy.

Budan bólek, Inderbor kentiniń ınfraqurylymyna júrgizilgen tekseris nátıjeleri tipten kóńil kónshitpedi. Prokýrorlar birqatar nysannyń múmkindigi shekteýli azamattar úshin qoljetimsiz ekenin anyqtady.

-Tekserý qorytyndysy boıynsha anyqtalǵan zańbuzýshylyqtar joıyldy. Inderbor kentiniń ákimi men uıym basshysy ákimshilik jaýapkershilikke tartylsa, aýdan ákiminiń áleýmettik salaǵa jaýapty orynbasary men áleýmettik baǵdarlamalar bóliminiń basshysy tártiptik jazaǵa ilikti. Nátıjesinde 19 múmkindigi shekteýli balanyń quqyǵy qorǵaldy,-delingen habarlamada.

Osyǵan deıin Qaraǵandyda múmkindigi shekteýli balaǵa merzimi ótken dári berý faktisi týraly jazdyq.