Atyraý oblysyndaǵy atystan 3 adam jaraqat alyp, aýrýhanaǵa jetkizildi

ATYRAÝ. KAZINFORM — Atyraý oblysynyń Saǵyz aýylynda taǵy da atys bolyp, 3 adam jaraqat aldy. 

Atyraý oblystyq polıtsııa departamentiniń baspasóz qyzmetiniń málimetine qaraǵanda, Saǵyz aýylyndaǵy atys keshe, 27 mamyrda túngi saǵat 23:00 shamasynda bolǵan.

— Qazir atalǵan derekke qatysty qylmystyq is qozǵaldy. Tergeý kezinde oqıǵanyń barlyq mán-jaıy anyqtalatyn bolady. Polıtsııa qyzmetkerleri qaqtyǵysqa qatysýshylardy anyqtaý, ustaý úshin keshendi sharalar qoldanýǵa kiristi. Qylmystyq isti tergeý departament basshylyǵynyń baqylaýyna alyndy, — dep málim etti departamenttiń baspasóz qyzmetinen.

Atyraý oblystyq densaýlyq saqtaý basqarmasy usynǵan aqparatqa súıensek, Saǵyz aýylynan úsh azamat ártúrli dene jaraqattarymen aýdandyq aýrýhanaǵa jetkizilgen.

— Sanavıatsııa qyzmetimen 1 naýqas jedel túrde oblystyq aýrýhanaǵa ákelindi. Medıtsına qyzmetkerleriniń jedel áreketiniń nátıjesinde tıisti alǵashqy medıtsınalyq kómek kórsetildi. Jaraqat alǵandarǵa shokqa qarsy jáne qan toqtatýshy terapııalar, aýyrsynýdy basý úshin em-domy júrgizildi. Naýqastarǵa ottegimen emdeý jáne ınfýzııalyq terapııa taǵaıyndaldy, — dep habarlady basqarmanyń baspasóz qyzmeti.

Dárigerler jaraqat alǵandardyń densaýlyǵyn baqylaýǵa alyp, qajetti em-dom sharalaryn júrgizip jatyr.

Eske sala ketelik, buǵan deıin Atyraýda alqabıler 21 adamǵa qatysty qylmystyq iske sheshim shyǵarǵanyn jazǵan edik.