Atyraý oblysyndaǵy aǵysy joq sýdan 3 kúnde 4,5 mln shabaq qutqaryldy
ATYRAÝ. KAZINFORM – Atyraý oblysyndaǵy byltyrǵy tasqyn kezinde bólinip qalǵan sýdan shabaq qutqarý sharasy jalǵasyp jatyr. Sońǵy 3 kúnde 4,5 mln shabaq qutqarylyp, Jaıyq ózenine jiberildi.

Jaıyq-Kaspıı oblysaralyq basseındik balyq sharýashylyǵy ınspektsııasynyń málimetine qaraǵanda, Mahambet aýdanynyń Esmahan aýyly tusyndaǵy sýdan shabaq qutqarýǵa 40 adam, 7 tehnıka tartylǵan.

– Byltyrǵy tasqyn kezinde jaıylmaǵa shyqqan sýda sazan, móńke sekildi balyqtardyń shabaǵyna qyrylý qaýpi tóndi. Sol sebepten 14 qańtardan beri shabaqtardy qutqarý jumysy kún saıyn júrgizildi. Máselen, 16 qańtarda aǵysy joq sýdan arnaıy tormen 2 mln 570 myń shabaq qutqaryldy. Shabaqtar arnaıy ydysqa salynyp, avtokólikpen Jaıyq ózenine tasymaldandy. Qutqarylǵan shabaqtardyń salmaǵy – 5 sm. Sońǵy 3 kún -14-16 qańtarda qutqarylǵan shabaqtardyń sany 4 mln 575 myń danaǵa jetti, -dep habarlady atalǵan ınspektsııadan.
Atyraý oblysy ákiminiń orynbasary Marat Mýrzıevtiń deregine qaraǵanda, shabaqtardy qutqarý jalǵasa beredi.

– Sońǵy kúnderi aýa-raıy kúrt ózgerip, salqyndaı bastady. Al jaıylmaǵa shyǵyp, Jaıyq ózenine, ne ózge kanaldarǵa qaıta qosylmaǵan sýda muz qatyp, ottegi azaıýy múmkin. Sondyqtan osyndaı sýdan shabaqtardy qutqarý máselesin baqylaýǵa aldyq. Maqsatymyz – balyq shabaqtarynyń qyrylýyna jol bermeý, -dep málim etti Marat Mýrzıev.
Eske sala ketelik, budan buryn Atyraýda byltyr Jaıyqtan bólingen sýdan 1 mln shabaq qutqarylyp, ózenge jiberilgenin jazǵan edik.