Atyraý oblysyndaǵy 53 mektepte kúzet kompanııasymen kelisimshart joq

ATYRAÝ. KAZINFORM – Qazir Atyraý oblysynda 115 memlekettik mekteptiń 27-sinde ǵana kúzet qyzmeti talapqa saı uıymdastyrylǵan. Al 35 bilim ordasynda kúzetshiler jas ereksheligi boıynsha qoıylǵan shartqa saı kelmeıdi.

Qoldanystaǵy zańnamaǵa sáıkes, qaýipsizdik deńgeıine qaraı mektepter 2 topqa bólinedi. І sanatqa oqýshy jáne qyzmetker sany 100-ge jetpeıtin mektepter jatady. Bul nysandar zań boıynsha mamandandyrylǵan kúzetpen baqylanbaıdy. Tek shtattaǵy kúzetshi ǵana qaýipsizdikke jaýap beredi. Al ІІ sanatqa kiretin 134 mektep mindetti túrde mamandandyrylǵan kúzetpen qamtylýy tıis. Alaıda búgingi kúni jaǵdaı kópti alańdatady.Sebebi 115 memlekettik mekteptiń 27-sinde ǵana kúzet qyzmeti tolyq jasaqtalǵan. Al 35 mektepte kúzetshilerdiń jas erekshelikterine baılanysty talaptardy sáıkestendirý jumystary júrip jatyr. 53 bilim ordasynda kúzet qyzmetin uıymdastyrý boıynsha memlekettik satyp alý konkýrstary áli aıaqtalmaǵan. Bul jumys naýryz aıynda qorytyndylanýy tıis.

Bilim berý basqarmasyna qarasty tárbıe bóliminiń bas mamany Kámshat Shoshaqovanyń sózinshe, tenderlerdiń sozylyp ketýine qyzmet kórsetýge nıetti kásipkerlerdiń az bolýy sebep. Jalpy bilim oshaqtary kúzet kompanııasymen 3 jylǵa kelisimshartqa otyrýy tıis. Bilim berý uıymdary memlekettik satyp alý boıynsha QR Oqý-aǵartý mınıstrliginiń 2025 jyldyń 15 mamyrdaǵy «Bilim berý uıymdarynda kúzet qyzmetterin satyp alý jónindegi úlgilik konkýrstyq qujattamany bekitý týraly» №112 buıryǵyn basshylyqqa alady.

- Osy buıryqty negizge ala otyryp, kelisimshartty qaıta jasaqtaý jumystary júrgizilýde. Mysaly, Atyraý qalasyndaǵy 71 mekteptiń 67-si shartty qaıta jasaqtap jatyr. Olardyń arasynda tender qorytyndysy shyǵyp, jumysty uıymdastyryp jatqan bilim oshaqtary bar. Jalpy tender jarııalanǵanmen tehnıkalyq talaptarǵa baılanysty suranys túspeıtin jaǵdaılar bolady. Osy sebepti kúzet qyzmeti uıymdastyrylmaı otyr. Degenmen mektep ákimshiligi tarapynan jumysshy mamandar qyzmet atqaryp jatyr. Mektepterde ishki tártipke sáıkes muǵalimderdiń kezekshiligi uıymdastyrylady, - dedi oblystyq Bilim berý basqarmasy tárbıe bóliminiń bas mamany Kámshat Shoshaqova.

Basqarma ókilderiniń sózinshe, mektep kúzetshileriniń jasy 25 pen 50 jas aralyǵynda bolýy tıis. Búginde bul kúzet kompanııalaryna qoıylyp otyrǵan basty talaptyń biri.

Atyraý oblysyna aqpan aıynda Oqý-aǵartý mınıstrliginiń bir top mamany mektep qaýipsizdigi boıynsha tekseris júrgizgen edi. Buǵan Qulsary qalasyndaǵy mektepterdiń birinde bolǵan jaǵdaı sebep. 10 synyp oqýshysy qatarlastarymen bolǵan janjaldan keıin olardy baltamen qýalaǵan sáti áleýmettik jelige jarııalanǵan edi. Bul toptyń quramynda bilim berý basqarmasynyń qyzmetkerleri de boldy. Olardyń aıtýynsha, monıtorıng kezinde mektepterdiń keıbirinde dabyl túımesi iske qosylmaǵan, jedel toptyń belgilengen ýaqytta kelmeýi syndy kemshilikter anyqtalǵan. Monıtorıngtiń top Atyraý qalasyndaǵy 66 mektepte bolyp, aýdandardaǵy bilim oshaqtarynyń 80 paıyzyna barǵan.

- Buryn mektep ishindegi qaýipsizdikke bir kompanııa jaýap berse, al dabyl túımesi basylǵannan keıin keletin jedel toptyń jumysy basqa mekemege tapsyrylǵan. ıAǵnı, eki tender jarııalanyp, qos kelisimshart jasalǵan. Qazirgi ýaqytta eki jumys bir kompanııaǵa tapsyrylady. Nátıjesinde dabyl túımesi basylǵan jaǵdaıda jedel áreket etý toby 10-12 mınýttyń ishinde mektepke keledi, - dedi oblystyq Bilim berý basqarmasy tárbıe bóliminiń bas mamany Kámshat Shoshaqova.

Basqarmanyń bergen aqparatyna súıensek, qazirgi ýaqytta 210 memlekettik mektepte ornatylǵan 11 813 kameranyń 531-i jóndelip jatyr.

Aıta keteıik, óńirde barlyǵy 524 bilim berý uıymy jumys isteıdi. Onyń ishinde 235-i – orta bilim beretin mektep. Olardyń 210-y - memlekettik, 22-si - jekemenshik, al qalǵan úsheýi - arnaýly.

Eske salaıyq, 13 naýryz kúni tústen keıin Atyraý qalasyndaǵy mektepterdiń birinde 9 synypta oqıtyn oqýshy 8 synyptaǵy qyzdy úshkir zatpen jaraqattaǵany jóninde jazǵan edik. 

3 kúnnen keıin oqýshy jansaqtaý bóliminen jalpy palataǵa aýystyryldy.