Atyraý oblysynda júk vagondary aýdarylǵan ýchaskede qozǵalys qalpyna keltirildi
ATYRAÝ. KAZINFORM – Búgin Atyraý oblysynda 4 júk vagony relsten shyǵyp ketip, 2-eýi aýdarylǵan edi. Sonyń saldarynan kúkirt tógilgen bolatyn.
Atyraý oblysy ákiminiń baspasóz qyzmetinen málim etkendeı, temirjoldaǵy apat Maqat stansasynda bolǵan.
Qulsary-Altynkól temirjol ýchaskesindegi (Maqat aýdany) apatqa baılanysty oqıǵa ornyna «Qazaqstan temirjoly» AQ-dan 40 adam, 3 tehnıka, 1 qalpyna keltirý jáne 1 órt sóndirý poıyzy, Maqat aýdandyq azamattyq qorǵaý qyzmeti men tótenshe jaǵdaılar departamenti bóliminiń, polıtsııa bólimi men kólik prokýratýrasynyń mamandary jiberilgen.
«Atyraý oblystyq sanıtarlyq-epıdemıologııalyq baqylaý departamenti men Ulttyq saraptama ortalyǵy zerthanasynyń mamandary apat bolǵan ýchaskede radıatsııalyq fonǵa tekserý júrgizdi. Tekserý kezinde eshqandaı aýytqý anyqtalmady. Apattan zardap shekkender men qaza tapqandar joq. Turǵyndardyń ómiri men densaýlyǵyna qaýip tónbedi», -dep habarlady ákimdiktiń baspasóz qyzmeti.
Qazir oqıǵa ornynda Atyraý oblystyq ekologııa departamentiniń qyzmetkerleri tekserý júrgizip jatyr. Júk tasymaldaýshyǵa zań buzýshylyqtardy joıý, tógilgen kúkirtti jınap alý týraly nusqaý berilgen.
Al, apat bolǵan ýchaskede qozǵalys qalpyna keltirilgen.
Eske sala ketelik, buǵan deıin Atyraý oblysynda 2 júk vagony aýdarylyp, jerge kúkirt tógilgenin habarlaǵan bolatynbyz.