Atyraý oblysynda júk kólikteri 30 tonnaǵa deıin artyq salmaqpen júr

ATYRAÝ. KAZINFORM – Atyraý-Inder baǵytyndaǵy trassada júk kólikteriniń 30 tonnaǵa deıin artyq salmaqpen júr.

Atyraý oblystyq kóliktik baqylaý ınspektsııasynyń bas mamany Batyrbek Nurbaıulynyń aıtýynsha, júk kólikteriniń júrgizýshileri aýyr júk tasymaldaý talabyn saqtamaıdy. 

«Aýyr júk kólikterge 25 tonnaǵa deıin júk tasymaldaýǵa ruqsat etilgen. Eger qosymsha tirkemesi bolsa, barlyq júktiń salmaǵy 40 tonnadan aspaýy qajet. Biraq, júk kólikteriniń júrgizýshileri bul talapty saqtamaıdy. Jyljymaly bekettiń kómegimen bir kúnde 6 «KamAZ» kóligindegi júk salmaǵyn ólshedik. Sol kezde júk kólikterinde shekti mólsherden artyq júk tıelgeni anyqtaldy. Qos tirkemesi bar júk kóliginde artyq júktiń salmaǵy 6 tonnany qurady. Keı kólikterge 30 tonnaǵa deıin artyq júk tıelgen», -deıdi Batyrbek Nurbaıuly. 

Onyń deregine súıensek, júk kólikteriniń ıelerine QR Ákimshilik quqyq buzýshylyq týraly kodeksiniń 571-babynyń, 6 jáne 9-shy tarmaǵymen hattamalar toltyrylǵan. Artyq júk tasymaldaǵan júrgizýshiniń birine 479 myń 960 teńge aıyppul salynǵan. 

Al, Inder aýdandyq turǵyn úı, kommýnaldyq sharýashylyq, avtomobıl joldary jáne jolaýshylar kóligi bóliminiń basshysy Shapaǵat Ǵabbasovtyń aıtýyna qaraǵanda, karerden ınertti materıaldar tasymaldaıtyn kásipkerlerge talapty kúsheıtilgeli otyr.

«Kásipkerlerge aýyr júk kólikterine ınertti materıaldar shekti mólsherden artyq tıelmeýi qajet. Buǵan jol bermeý úshin kásipkerderdiń ózinde aýyr júk kólikterine tıelgen soń salmaqty ólsheıtin qural bolýy qajet. Osy talapty saqtaý jóninde kásipkerlerge túsinik jumystary júrgizilip keledi. Biraq, olar bul talapty tıisti deńgeıde oryndamaı otyr. Sondyqtan, aldaǵy ýaqytta reıdttik is-sharany udaıy ótkizemiz», -deıdi Shapaǵat Ǵabbasov.

Eske sala ketelik, budan buryn Atyraýda sý tasqynynan búlingen 25,6 shaqyrym jol men 6 kópir jóndelip jatqanyn habarlaǵan edik.